Zbulohet historia e armës snajper që kreu vrasjen e Rrëshenit

Snajperi i markës italiane “Sabatti” që u përdor për të ekzekutuar Kastriot Reçin pak ditë më parë në Rrëshen, rezulton se i përket një shtetasi kosovar nga Rahoveci.

Ky informacion është konfirmuar për Policinë e Shtetit nga homologët kosovarë, por ata kanë saktësuar se arma është denoncuar si e vjedhur disa ditë më para se të ndodhte ekzekutimi mafioz i 47-vjeçarit Reçi.

Sipas ”Klan”, pronari i armës, nga Rahoveci, ishte i pajisur me lejen përkatëse me pretendimin e përdorimit si armë gjahu.

Në fakt edhe vetë kompania italiane që e ka prodhuar këtë armë, e reklamon atë si një armë të sofistikuar gjahu, duke e shitur atë vetëm në vendet ku lejohet.

Arma e pajisur me dylbi dhe silenciator mund të qëllojë në një distancë deri 200 metra, dhe është e çmontueshme në të paktën 3 pjesë.

Fakti që vjen nga Kosova është një element i ri, shumë i rëndësishëm tek hetimet.

Siç u pa edhe në pamjet e filmuara nga kamerat e sigurisë, Reçi pak momente para vrasjes ka zbritur nga një makinë “Benz”, më pas ai është takuar me një grua dhe një fëmijë përpara lokalit të tij.

Ai është qëlluar nga 150 metra distancë me një plumb të vetëm në zemër nga kati i nëntë i një pallati.

Pasi ka kryer vrasjen, autori ka dalë nga godina, i veshur si grua. Më pas ka hedhur paruken, pelerinën, dhe këpucët.

Hetuesit janë të sigurtë se vrasja është kryer nga vrasës me pagesë.

l.h/ dita