SOCIALE / Pensionisti i vetmuar Sabile Risha viziton liqenin, argëtohet duke qëlluar patat me gur në kokë

TIRANË – Dashuria për natyrën, paqja dhe qetësia shpirtërore pranë gjelbërimit dhe krijesave të këndshme të perëndisë, është një nga elementët që i ndihmon moshat e thyera të kalojnë një pension aktiv dhe të shëndetshëm.

Nuk mund të bëjë përjashtim nga ky argëtim as pensionisti Sabile Risha, i cili shpjegon për Gojët e Liga se vjen shpesh nga kodrat e liqenit të Tiranës, ku ka mundësi të bjerë në kontakt me shpezë e kafshë të ëmbla.

“Është bukur të kalosh disa çaste pranë natyrës,” thotë 74 vjeçari, “unë gjithmonë e shijoj shumë marrjen shenjë dhe goditjen e patave me gur mu në kokë”.

Risha shton se shpezët mund të jenë edhe pulëza uji, pëllumba të rastësishëm apo turtuj.

“Nuk ka rëndësi lloji, por patat i preferoj më shumë se janë trupmëdha dhe i merr nishan më kollaj. Është kaq qetë, kaq këndshëm këtu, saqë më bie mendja rehat,” thotë pensionisti paqësor.

AI shpjegon se rituali i preferuar është ulja në një stol pranë ujit pasi ka mbledhur një tufë gurësh të përshtatshëm.

“Një herë kam goditur një patë mu në çaçkë të kokës. E palosa direkt. Disa pata e pulëza i kam qëlluar me siguri në trup, ndoshta kanë ngordhur më vonë në një ndonjë cep,” thotë i emocionuar pensionisti.

Ai e vazhdon këtë ritual deri sa erret, e ndonjëherë të afërmit detyrohen ta marrin me zor, duke i premtuar se do të vrasë sërish gjallesa nesër.

Befas Sabile Risha pikasi një patë që po notonte me siklet, dhe bërtiti i ekzaltuar:

“Jaaa, e shikon atë topallen, atë patën ezmere? Para dy ditësh e zuri një gjysmë tulle mu në palcë të kurrizit! Çudi sesi noton ende!”        

Pensionisti pohon se herë pas here merr edhe nipërit e mbesat me vete.

Kënaqësia e të qëlluarit të shpezëve me gjyshin, me shpresën se do vrasin ndonjë, është e madhe për pasardhësit e fisit Risha. Por akoma më e madhe është krenaria e gjyshit që ata po ecin në gjurmët e tij.

Një moment Sabile Risha e ndërpreu bisedën. Një nga nipërit vjen me vrap dhe e njofton i skuqur nga triumfi:

“Gjyshi!!! Kena gjet një fole me vezë pulëzash! Eja t’i thyjm e t’i vemë flakën!”

74 vjeçari buzëqesh, kërkon ndjesë duke gjestikuluar me duar, “ehh, ç’ti bësh, kalamaj hesapi”, pastaj merr nipin për dore dhe largohet, duke i dhënë një nga mësimet e çmuara të jetës:

“Jo të keqen gjyshi. Do presim të fshehur pranë folesë, sa të vijnë dhe prindërit e vezëve, pastaj i vrasim të gjithë!”  

*****

Shënim: Gojët e Liga është rubrikë satirike pro moshave të treta