Sondazhi: Cili është populli që mendon se jeton “në vendin më të mirë në botë”

Sipas një sondazhi të zhvilluar nga You Gov (Projekti për Globalizëm Cambridge) në 23 vende të botës, amerikanët vazhdojnë të jenë më krenarë se të gjithë popujt e tjerë për vendin e tyre.

Në krahasim me të tjerët ata kanë përqindjen më të lartë të atyre që besojnë se jetojnë “në vendin më të mirë në botë”, raporton Dita duke cituar mediat ndërkombëtare.

Vetëm 6% e francezëve dhe 10% e britanikëve thanë se ata jetonin në vendin më të mirë në botë. Përqindja më e ulët ishtë në Gjermani me 5%. Ndërsa 28% e kanadezëve, 29% e australianëve, po 29% e kinezëve dhe 33% e sauditëve mendonin se jetonin në vendin më të mirë në botë.  Ndërsa ky besim në SHBA arrin shifrën 37%.

Gjithashtu bëhet me dije se, 28% e të pyeturve thanë se Shtetet e Bashkuara ishte një vend më i mirë se shumica e vendeve të tjera, dhe vetëm 7%, ndër përqindjet më të ulta në sondazh, thanë se SHBA ishte po aq e mirë sa vendet e tjera.

Por ndryshe nga sa mund të mendohet, kjo krenari nuk i verbon amerikanët. Në fakt, 40% e të pyeturve thanë se ata nuk e pëlqenin aspak presidentin, 70% ishin të mendimit se zyrtarët e zgjedhur nuk ishin të ndershëm dhe 64% mendonin se vendi i tyre ishte i ndarë mes njerëzve të thejshtë dhe një elite të korruptuar që i shfrytëzonte.

Megjithatë, ata e donin vendin e vet.

Një tjetër aspekt i amerikanëve i bërë publik në sondazh ishte përqindja relativisht e ulët e atyre që udhëtonin jashtë.  65% e të pyeturve nuk e kishin lënë vendin për të vizituar një shtet tjetër 12 muajt e fundit, që ishte edhe shifra më e lartë në mes të pyeturve.

Sipas ekspertëve të prononcuar për këtë sondazh, përqindja e lartë e amerikanëve që ishin shprehur kështu shprehte në fakt atë që ‘Amerika’ simbolizon. Kjo qasje suportohet edhe nga shifra e lartë e më shumë se 25 mijë të pyeturve nga e gjithë bota që zgjodhën SHBA si vendin e dytë më të mirë për të jetuar, pas Japonisë por para Kanadasë – raporton Dita.

e.ll. / dita