Ish-‘First Lady’ Hillary Clinton ngjitet në sondazhe pas debatit të parë televiziv presidencial. Sipas “Politico/Morning Consult”, kandidatja demorate ka 41% të votave kundrejt 38% të republikanit Donald Trump. Para debatit, miliarderi ishte përpara me një pikë në të njëjtin sondazh. 49% e të intervistuarve, ka qenë pro fitores së Clinton në duelin e parë televiziv, ndërsa për mandatin e pasurive të paluajtshme, ka pasur vetëm 26%.
Ndërkohë, kandidatët e zgjedhjeve presidenciale të 8 nëntorit, kanë “mprehur armët” në prag të dy debateve të ardhshme televizive. Për të parakaluar konkurrenten e tij, Trump, e ka sulmuar Hillary-n, duke u kthyer te triumfet e fillimit për t’i dhënë moralin e duhur zgjedhësve të tij të dekurajuar nga qëndrimet e fundit të republikanit.
“Nuk doja ta sulmoja, nuk doja ta vija Clinton në siklet, por e vëzhgova mirë: ajo i përket së shkuarës”, – ka shpjeguar Trump gjatë një takimi në Florida, duke premtuar pastaj se do të ishte më i ashpër në debatin televiziv të radhës.
Gjatë debatit, Trump u sulmua nga rivalja demokrate, e cila e akuzoi se nuk ka publikuar të dhënat e pasurisë së tij dhe duke i bërë të ditur se nuk është kaq i pasur siç thotë. Sipas renditjes së bërë nga “Forbes”, kandidati republikan ka ‘ndaluar’ në 3.7 miliardë dollarë pasuri, 800 milionë më pak se në vitin e shkuar. Rënia, ka të bëjë me ndikimin që ka pësuar tregu imobiliar në Nju Jork.
Po ashtu miliarderi, i ka dhënë fushatës së tij 7 miliardë dollarë dhe ka huazuar 48 milionë të tjerë, që “Forbes” thekson se nuk do të rikthehen. Revista amerikane, kundërshton edhe pohimin e bërë nga Trump në debatin presidencial të së hënës, ku ka deklaruar për komisionin elektoral federal se ka pasur 694 milionë dollarë të ardhura për vitin 2015.