Për 66 minuta, kombëtarja U-21 ushqeu iluzionin se mund të merrte një rezultat pozitiv përballë skuadrës më të mirë të kontinentit në këtë moshë, por një gabim në mesfushë rezultoi fatal për gjithë takimin. Shqipëria u mund 0-2 nga Spanja, kampione e Evropës, në takimin e luajtur dje në stadiumin “Ruzhdi Bizhuta” në Elbasan. Për hir të së vërtetës, një humbje e pritshme, përballë një skuadre që nuk është thjesht më e mira, por dominon me dhunë arenën evropiane, e formuar me futbollistë që luajnë me skuadrat e para në ligën e spanjolle, përfshirë edhe dy të mëdhenjtë, Real Madrid e Barcelonën. Kuqezinjtë e Skënder Gegës vinin në përballjen e djeshme si të fundit e grupit, por me moral të përmirësuar pas fitores befasuese në Hungari.
Spanja ishte skuadra më e mirë në fushë, por Shqipëria iu përgjigj me zemër kualitetit superior të iberikëve dhe pjesën e parë e mbylli në barazim. Kështu iku edhe gjysma e së dytës, ndonëse pas pushimit Spanja e rriti më tepër presionin. Për t’u theksuar se prania e Ergys Kaçes në mesfushës e ka përmirësuar ndjeshëm lojën e Shqipërisë, në të dyja ndeshjet e fundit. Futbollisti i PAOK-ut, së bashku me Herolind Shalën, vrapuan mjaft në mesfush, fituan shumë duele përballë spanjollëve, e megjithatë nuk mjaftoi. Në minutën e 66-të, një gabim në mbrojtje i dha mundësi Sergi Robertos të nxirrte të lirë para portës Iker Muniain dhe sulmuesi i Athletic Bilbaos shënoi golin e avantazhit për Spanjën.
Kuqezinjtë pësuan tronditje nga goli, megjithatë e patë një mundësi barazimi, me Shalën, por ai gjuajti dobët dhe portieri kundërshtar priti pa probleme. Tri minuta para fundit, një tjetër gabim dhe Deulofeu shënon edhe golin e dytë për spanjollët, që arrijnë fitoren e gjashtë në po aq ndeshje të grupit dhe janë pothuajse të kualifikuar në finalet e Euro 2015 për kategorinë U-21. Shqipëria kthehet te humbjet, megjithatë ndryshe nga herët e tjera, përballë një skuadre që sa herë luan njeh vetëm fitore, ndërkohë që edhe loja ka shfaqur rritje.
U-21/ Euro 2015
Grupi 4
SHQIPËRI-SPANJE 0-2
Golat: Muniain 66′, Deulofeu 87′
SHQIPERIA: Teqja, Prençi, Gjokaj, Kotobelli, Husaj, Shala, Kaçe, Gino (Muriqi 59′), Kruja (Bardulla 46′), Batha (Rrahmani 79′), Shkurtaj. Trajner: S. Gega
SPANJA: Pacheco, Carvajal, Sergi Gómez, Amat, Bernat, Sergi Roberto (Ñiguez 69′), Óliver Torres, Campaña (Sergi Darder 79′) , Muniain (Samperio 86′), Morata, Deulofeu. Trajner: J. Lopetegui
Gjyqtarë: M. Panaji, M. Dhimitriadhis, M. Centis (Qipro)
Kartonë të verdhë: Batha, Gjokaj, Kotobelli / Amat, Sergi Roberto
Renditja
Nr Skuadra N F B H Gol. Pikë
1 Spanja 6 6 0 0 22:5 18
2 Austria 4 3 0 1 7:6 9
3 Bosnja 6 2 0 4 9:16 6
3 Hungaria 5 2 0 3 6:7 6
5 Shqipëria 7 1 0 6 4:14 3