Autoritetet spanjolle thonë se të paktën 50 vetë kanë gjetur vdekjen dhe shumë të tjerë janë plagosur në një aksident hekurudhor në Spanjën veriore.
Një zyrtar i rajonit ku ndodhi incidenti tha se treni doli nga shinat mbrëmë vonë pranë një stacioni në rrethinat e qytetit Santiago de Compostela.
Pamjet televizive tregojnë trupa të mbuluar me batanije pranë shinave ku ndodhen edhe vagonat e dëmtuar.
Treni ishte nisur nga Madridi me destinacion qytetin veri-perëndimor Ferrol, ndërkohë që rajoni Galicia në Spanjë përgatitet për festivalin që nderon shenjtorin Santiago.
Nuk është ende i qartë shkaku i aksidentit, por autoritetet po zhvillojnë hetime.