Policia e Tiranës dha sqarimin zyrtar për arrestimin e Ismail Morinës, i riu i cili u bë i njohur për shkak të hedhjes së dronit me flamurin e Shqipërisë së Madhe në stadiumin “Partizani” të Beogradit.
Policia sqaron se Morina është arrestuar për armëmbajtje pa leje, ndërsa tre personat e tjerë për moskallëzim krimi. Përveç Morinës, policia ka arrestuar edhe Erion Bahushin, 22-vjeç, Denis Ballën, 21 vjeç, si dhe Marin Rexhën, 20-vjeç, të gjithë banues në Tiranë.
“Ndaj këtyre shtetasve është ushtruar kontroll nga shërbimet e policisë në rrugën “Petro Nini Luarasi” dhe gjatë kontrollit fizik të ushtruar shtetasit Ismail Morinaj, i është gjendur e fshehur në trup (xhep) një armë zjarri e tipit pistoletë “Zastava “me gjashtë fishekë. Ky shtetas ishte duke drejtuar mjetin tip Land Rover me targë AA 874 KY dhe gjendej në shoqërinë e shtetasve Erion Bahushi, Denis Balla dhe Marin Rexha.
Gjatë kontrollit të mjetit në pjesët e brendshme të tij është bërë e mundur gjetja dhe një armë tjetër pistolete tip TT si dhe 30 fishekë për këtë pistoletë”, sqaron policia.
Gjithashtu në automjetin e këtij shtetasi i janë gjendur dhe 36 bileta, me emra të ndryshëm, për ndeshjen Shqipëri – Serbi. Burimet zyrtare sqaruan se në automjet është gjendur dhe një gëzhojë pistoletë. Shtetasit e mësipërm janë arrestuar nga policia, ku edhe është përpiluar akuza ligjore, e cila do t’i kalojë Prokurorisë. /Dita/
