Statistikat paraprake: Rritja ekonomike 1.39%

Instituti i Statistikave publikoi të dhënat paraprake për Prodhimin e Brendshëm Bruto, që flasin për një rritje ekonomike prej 1.39%. Surpriza qëndron në diferencën e konsiderueshme me pothuajse një pikë përqindje nga vlerësimi paraprak i vlerës së shtuar bruto, i publikuar në muajin prill të këtij viti. Vlera e shtuar bruto mat kontributin e aktiviteteve të ndryshme në PBB dhe llogaritet si diferencë midis prodhimit dhe konsumit të ndërmjetëm. Të dhënat tremujore janë kryesisht të dhëna administrative, si dhe të marra nga anketat tremujore që kryhen nga INSTAT. Sidoqoftë, vetë INSTAT në çdo rast, saktëson se këto seri janë gjithmonë subjekt i revizionimeve të ardhshme, gjë që lidhet me përmirësimin dhe shtimin e informacionit në kohë. Për të llogaritur Prodhimin e Brendshëm, në vlerën e shtuar bruto mblidhen edhe taksat, ndërsa zbriten subvencionet, duke sjellë një rezultat më të saktë. Duke e marrë rritjen në analizë sipas sektorëve, del që industria ishte dega më e shëndetshme e ekonomisë, me rritje 7.9%. Besohet se kjo lidhet sidomos me vitin e mbarë në eksporte të degës së industrisë nxjerrëse. Rritje pozitive shënoi edhe sektori i ndërtimit, me 1.13%, duke marrë avantazh nga viti elektoral dhe shpenzimet e rritura publike në infrastrukturë. Edhe bujqësia regjistroi rritje pozitive, me 0.61%, ndërkohë që viti rezultoi mjaft negativ për degët e transporteve dhe post-komunikacioneve, ku secila ra me mbi 8% krahasuar me vitin 2012.