Trajneri i Interit shprehet se lënia jashtë loje e mesfushorit holandez nuk ka lidhje me presionin për rinovimin e kontratës
Trajneri i Interit Andrea Stramaçoni këmbëngul se Uesli Shnajder, i cili pritet që në janar të kalojë tek Mançester Junaited, nuk po lihet jashtë loje për t’i bërë presion për rinovimin e kontratës.
Interi, i cili duket se është gati ta shesë kapitenin holandez në vit të ri, ditët e fundit është akuzuar se ka kërcënuar mesfushorin pasi drejtori Marko Branka i tha se nuk mund të luante përsëri me klubin derisa të merrej një vendim për zgjatjen e kontratës.
Interi do që Shnajderi të nënshkruajë një marrëveshje të re me një pagë më të ulët, diçka që lojtari nuk dëshiron ta bëjë, aq më tepër që tashmë është lënë pas dore.
Presidenti i Interit, Masimo Morati, u shpreh këtë javë se në janar mund të ketë lëvizje, por Stramaçoni deklaroi se 28-vjeçari është lënë jashtë skuadrës javët e fundit për arsye taktike.
Ish-mesfushori i Real Madridit nuk ka luajtur që nga shtatori.
“Të gjitha vendimet e marra për lojtarëve të mi janë bërë vetëm nisur nga vlerësimet e mia”, u tha Stramaçoni gazetarëve. “Nëse holandezi luan apo caktohet në skuadër, është vendimi im dhe i askujt tjetër. Unë mbaj përgjegjësi.
Ai po stërvitet me lojtarët e tjerë të skuadrës. Po punon mirë dhe shpresoj të mos kem arsye për t’iu përgjigjur këtyre pyetjeve sërish. Besoj se kam folur shumë lidhur me këtë argument”.
Dioni, në anën e Ueslit
Holandezja 21-vjeçare Dioni Tabers konsiderohet tashmë Sofia Loren e re. Ajo ka pozuar për disa prej revistave më të njohura të modës duke zënë gjithnjë kopertinat.
Dhe siç shkruajnë mediat italiane, Dioni ka një pasion shumë të madh për futbollin, si dhe për holandezin më të diskutuar të momentit: Uesli Shnajderin, duke u konsideruar kështu një rivale shumë e rrezikshme për gruan e tij të bukur, Jolanda.