Vetëvritet dhëndri që vrau vjehrrën dhe vjehrrin një javë më parë. Riza Latifi është vetëvrarë në banesën e tij vetëm pak ditë pas vrasjes së dyfishtë në shtëpinë e bashkëshortes së tij në Kuçovë. Mësohet se Latifi i ka dhënë fund jetës, pasi ishte i rrethuar nga forcat e policisë, të vëna në aksion për kapjen e tij.
Riza Latifi rezultonte në kërkim për vrasjen e Rexhep Muços, 68 vjeç, dhe Vasilika Muços, 66 vjeç dhe plagosjen e bashkëshortes së tij, Engjëllushe Latifi. Ngjarja ndodhi gjashtë ditë më parë në qytetin e Kuçovës. Shkak për vrasjen u bë kërkesa për divorc nga Engjëllushe Latifi, e cila ishte zhvendosur në shtëpinë e familjes së saj në lagjen “1 Maji” të qytetit të Kuçovës. Autori i vrasjeve u largua menjëherë pas krimit. Ndërsa pak ditë më pas, policia arrestoi dy persona që e kishin ndihmuar atë të fshihej, por pa rënë dot në gjurmë të vrasësit.