Sulmohet lokali i Lorik Canës në ish-Bllok

Mëngjesin e ditës së djeshme, në zonën e ish-Bllokut, pranë rrugës” Brigada e VIII”,  lokali i futbollistit Lorik Cana është parë me xhama të thyer dhe vazot e luleve të copëtuara. Punonjësit e këtij ambienti teksa kanë shkuar në punë si zakonisht, nuk kanë gjetur pamjen e përhershme, por… diçka kishte ndodhur. Lokali tërhiqte vëmendjen e kalimtarëve, në hyrje të të cilit gjendej një grumbull i madh xhami në shkallët e tij.

Ne u interesuam, për të  kuptuar më shumë se çfarë kishte ndodhur me pronën dhe biznesin e yllit të futbollit shqiptar. Në kontakt me punonjësit e këtij ambienti mësuam se, një makinë kishte tentuar të futej në brendësi të lokalit. Sipas informacioneve tona, personi i cili drejtonte automjetin ishte në gjendje të dehur, ai ka humbur kontrollin e makinës dhe në këtë mënyrë ka thyer fasadën prej xhami të lokalit. Ish-Blloku është një nga zonat e “zgjuara” të Tiranës,  aty ku edhe jeta e natës  arrin kulmin e saj.

Ngjarja ka ndodhur rreth orës 5:00 të mëngjesit kur Kozma Cicit i ka dalë nga kontrolli automjeti tip Opel Astra dhe ka përfunduar mbi trotuar duke dëmtuar vetratat e vinotekës së Canës. Ndonëse Cici nuk pësoi plagë të rënda nga aksidenti, ai është arrestuar nga policia për drejtim të automjetit në gjendje të dehur ku edhe rezultoi pozitiv në testin kundër alkoolit.

Lokali

Përveç futbollit,  Loriku ka nisur të merret edhe me biznes.  Ky dyqan verërash franceze në Tiranë është hapur dhe ka patur inaugurimin e tij në fund të vitit 2012. Ai është një pijetar i mirë i verërave, kështu që ka preferuar ta sjellë këtë pije origjinale franceze në zonën e ish- Bllokut. Ndërkohë, më herët kemi mësuar se ky  është një vend i rrallë në kryeqytet, më saktë është një ambient për të shijuar pijen e  verës, nuk funksionon si një vend më shumë tavolina, por maksimumi tre.

Që do të thotë, nuk është për klientel të zakonshme, por për njerëz të cilët kërkojnë dhe janë të pasionuar pas verës.  Në të gjenden më shumë se 76 lloje verash nga vende të ndryshme të botës, me çmime 800-19 mijë lekë shishja.  Aksionari kryesor i lokalit është Agim Cana, i ati i Lorikut. Nëse do të pish diçka, e cila pa diskutim do të jetë verë franceze, duhet të prenotosh më parë dhe i gjithë lokali është i yti dhe i miqve të tu.

Në qershor kemi dasmë

Sipas të gjitha gjasave, Lorik Cana do të lidhë kurorë në qershor të këtij viti me të dashurën e tij italiane, Monika. Një gjë të tillë e konfirmoi një ditë më parë babai i kapitenit të Kombëtares sonë, Agim Cana, në një intervistë për mediat italiane, por e ka pohuar me goxha batuta edhe vetë Loriku. Kombëtarja shqiptare është grumbulluar në Durrës para ndeshjes miqësore me Maltën, e cila  u zhvillua dje në stadiumin “Niko Dovana”. I pyetur gjatë konferencës për shtyp nëse ai kishte ndjekur thjesht shembullin e ish-kapitenëve, Altin Lala dhe Erjon Bogdani (edhe këta të martuar me vajza italiane), Loriku u përgjigj: “Nuk bën mirë me prish rregullin, apo jo… Jam drejt asaj rruge dhe shpresoj të jem aq i lumtur me të dashurën time, sikundër janë edhe ata (Lala dhe Bogdani)”, ka thënë Cana.

Goli i së dielës dhe media

Një gol për t’u mbajtur mend gjatë. E diela nuk ishte vetëm mbrëmja e çmimeve Oscar, por edhe mbrëmja e Lorik Canës, emri i të cilit nuk mungon në disa nga mediat kryesore të Gadishullit Apenin. Kryevepra që mbajti larg telasheve skuadrën e Lazios, rezultoi edhe vendimtare për fatin e takimit që rikthen në lojë për një vend në Europa League skuadrën bardhekaltër. Në këtë mënyrë, goli i kapitenit kuqezi gjen një hapësirë të madhe edhe në mediat e shkruara të cilat nuk i kursejnë elozhet për mesfushorin. “Cana alla Messi” shkruan “Corriere dello Sport” sipas së cilës, goli i shqiptarit vendosi fatin e takimit të luajtur në “Artemio Franchi”. Cana vlerësohet gjithashtu me notën më të lartë nga kjo gazetë. Me 7.5 vlerësohet paraqitja e lojtarit shqiptar, më mirë se kushdo tjetër në fushën e lojës. Një titull të veçantë zgjedh edhe e përditshmja torineze e cila luan me një lojë fjalësh duke vendosur fillimisht emrin e lojtarit kuqezi, të cilin e lidh me festën e Lazios në fund të takimit ndaj Fiorentinës. Nuk kursehet në elozhe edhe “Gazzetta Dello Sport” sipas së cilës, goli i kapitenit kuqezi është për t’u mbajtur mend gjatë. Në faqet e të përditshmes milaneze, Cana vlerësohet me notën 7, po as sa mesfushori argjentinas, Lucas Biglia. Një titull të veçantë këtij suksesi i rezervon edhe “Il Messagerio” që shkruan se Lorik Cana riktheu Lazion në garë për një vend në Europa League. Një natë magjike në tapetin e kuq, Lorik Cana fiton simpatinë e tifozerisë dhe shoqërisë bardhekaltër në një sezon ku gjërat nuk po shkojnë në drejtimin e duhur për skuadrën kryeqytetase.

Cana për familjen dhe Monikën

Pak kohë më parë, duke folur për mediat italiane, Cana ka bërë të ditur se është përshtatur menjëherë me realitetin e ri në kryeqytetin italian, edhe falë njohjes me të dashurën 25-vjeçare. “Me Monikën jemi njohur prej më shumë se dy vitesh. Ajo është studente për arkitekturë. Unë e dua shumë atë, jemi vërtet mirë së bashku. Asnjëherë nuk mund ta dish të ardhmen e një marrëdhënieje, por shpresojmë që lidhja jonë të vazhdojë në mënyrën më të mirë. Ajo është një vajzë spontane dhe përpiqet të përshtatet me rutinën time të futbollit. Është e vetëdijshme për nevojat e mia dhe më mbështet fort.

”Cana është çdo ditë atje, duke shkelmuar topin e futbollit, si në stërvitje dhe ndeshje zyrtare, çka i ka mundësuar të ndërtojë një forcë të konsiderueshme ekonomike, veçanërisht të rëndësishme për që të ndihmuar familjen e tij. Elementet e së kaluarës nuk janë për t’u nënvlerësuar, sepse vetë Loriku thotë se ka jetuar një fëmijëri jo pa vështirësi: “Unë jam me fat, sepse kam bërë diçka që lidhej me pasionin. Jam shumë i kënaqur që jam marrë me futbollin, sepse prej tij siguroj tashmë një jetë të lumtur, jo vetëm për veten, por edhe për familjen time: prindërit, vëllezërit e motrat, dhe gjyshërit.

Me kalimin e kohës të duhet të mendosh edhe për krijimin e familjes tënde. Futbollistët janë shumë të zënë në fakt, ndaj nuk mund t’i gëzojnë sa duhet avantazhet që të jep jeta. Personalisht jam i përkushtuar për të ndërtuar një të ardhme të mirë, por kurrë nuk do ta harroj dashurinë e familjes, e cila më qëndron shumë afër: “Unë u rrita me gjyshen time, e cila më mësoi të gatuaj shumë gjëra. Kam qenë shumë i shëndetshëm si fëmijë. I dua shumë pjatat tradicionale që gatuhen në Kosovë. Ne kemi punuar si një ekip në familje, ndaj edhe kemi bërë përpara,” tregon “luftëtari” me zemër të art.