Banka Botërore: Qeveria të vijojë angazhimin, niveli i të ardhurave ka qenë më i ulët sesa pritej

Shqipëria sapo ka marë një hua të re nga Banka Botërore. Në këtë intervistë me zj. Tahseen Sayed, Përfaqësuese e përhershme e Zyrës së Bankës Botërore në Shqipëri, revista Monitor e pyet për çfarë do përdoren këto para.

“Ne do të mbështesim reformat e Shqipërisë për të rikthyer stabilitetin makro dhe atë fiskal. Rezultatet e pritura përfshijnë përmirësimin e disiplinës fiskale dhe mosakumulimin e detyrimeve të reja të qeverisë qendrore, reduktimin e kredive me probleme dhe planifikimin e menaxhimit më të mirë të investimeve të infrastrukturës rrugore – thotë ndër të tjera zyrtarja e BB.

Ajo shton që BB pret që “qeveria të vazhdojë angazhimin për të arritur objektivin e deficitit buxhetor të vitit 2015, pavarësisht se niveli i të ardhurave ka qenë më i ulët sesa pritej, që ka ardhur kryesisht si rrjedhojë e faktorëve të jashtëm”.

“Në kahun e të ardhurave, qeveria duhet të vazhdojë të përmirësojë administrimin e taksave dhe kapjen e rasteve të mashtrimit. Së fundi, pavarësisht nevojave për konsolidim, qeveria duhet të monitorojë ngushtësisht ekzekutimin e shpenzimeve kapitale, në mënyrë që të shmangë një shkurtim bazuar në nivelin e ulët të ekzekutimit të tyre, që minon rimëkëmbjen ekonomike– shton Sayed.