“Të ndihmoj në provimin e maturës, nëse voton PD”

Kur është puna për të rritur numrin e votave, çdo formë apo mekanizëm është i pranueshëm për PD. Kështu, ndihma e maturantëve gjatë provimit të djeshëm të letërsisë është forma më e re e përfitimit të votës. Fakti është denoncuar në gazetën “Shqip” nga kreu i degës së Partisë Socialiste në Fier, Andius Olldashi. Sipas tij, pavarësisht se dje u deklarua se ishin marrë gjithë masat me qëllim që të mos lejohej kopjimi, një urdhër verbal i dhënë nga strukturat e degëve të PD-së në qarqe për drejtoritë arsimore, ka bërë drejtuesit e këtyre të fundit t’u kërkojnë mësuesve që vëzhgojnë mbarëvajtjen e provimit të ndihmojnë maturantët. Sipas Olldashit, këta mësues i janë shprehur se ky urdhër verbal i dhënë nga drejtuesit e tyre u është dhënë me qëllim komprometimin e 18-vjeçarëve që votojnë për herë të parë në zgjedhjet e 23-qershorit. Ai shtoi se nga informacionet që ka marrë, ky urdhër verbal është udhëzuar nga Tirana. “Në cilësinë e kryetarit të degës së Partisë Socialiste të Qytetit të Fierit denoncoj mënyrën se si Partia Demokratike po përdor mënyra nga më të neveritshmet për të blerë votat, këtë herë atë të atyre që votojnë për herë të parë, duke u dhënë një mësim negativ pikërisht në ditën kur bëjnë testimin e parë të maturimit. Nga denoncime të mësuesve të ndryshëm pranë degës së PS-së së Fierit, të cilët kanë qenë pjesë e komisioneve të vëzhgimit, të cilët kanë pasur si detyrë që të mos lejojnë që maturantët të kopjojnë, ju është kërkuar nga eprorët që t’i ndihmojnë ata duke u ofruar adoleshentëve nota më të mira nga ato që meritojnë. Gjithashtu, kemi informacione se atyre të rinjve që votojnë për herë të parë dhe që kanë pranuar të anëtarësohen në Partinë Demokratike, ju është dhënë teza e provimit e zgjidhur”, theksoi Olldashi.

Ai e cilësoi këtë veprim si një makinacion të PD-së, që ka si qëllim tentativën që kjo forcë politike po bën për të manipuluar brezin e ri. “Partia Demokratike me këto urdhra të dhënë ndaj arsimtarëve tregon qartë se sa vlen rinia për ta. Vetëm me qëllim marrjen e votës së atyre maturantëve që votojnë më 23 qershor po i joshin me një notë më të mirë se ajo që meritojnë. Edhe pse për momentin këta 18-vjeçarë mund të ndihen mirë, unë ju bëj thirrje që ata të mos pranojnë të shiten për një notë. Ju bëj këtë thirrje, pasi ajo notë nuk do të vlejë për të ardhmen e tyre në jetë, do jetë ashtu si është në të vërtetë, ‘një mashtrim’ që bëhet me qëllime negative nga ana e PD-së. Gjithashtu, u bëj thirrje gjithë mësuesve që janë pjesë e këtyre komisioneve të vëzhgimit që të mos bien pre e urdhrave apo shantazheve që po ushtron sot Partia Demokratike ndaj tyre dhe të mos shkelin ligjin. Tashmë dihet publikisht që Partia Demokratike po i detyron mësuesit që të mbushin sheshet e mitingjeve të Berishës, po i detyron të bëhen anëtarë të komisioneve në qendrat e votimit, duke i kërcënuar me bukën e gojës. Por do t’u kërkoja që të paktën të mos bëhen pjesë e zhgënjimit të brezit të ri, me qëllimin e mbrapshtë, për të blerë një votë me një notë më të mirë, të pamerituar”, përfundoi Olldashi.