Të nisësh një biznes në vendin tonë, vetëm 2 procedura

Të nisësh një sipërmarrje të re në kohë krize është rrisk. Kjo kërkon një studim të detajuar të tregut, mundësive që afrohen dhe garancive të suksesit. Por një pjesë e rëndësishme në një nisje të mbarë të biznesit janë dhe procedurat e çeljes së tij. Në këtë drejtim qeveria shqiptare po punon që për periudhën 2014-2020, të marrë një sërë masash për reduktimin e barrierave për të bërë biznes. Për këtë ajo ka hartuar një strategji ku flet për reduktimin e procedurave të nisjes së biznesit nga 5 që janë tani vetëm në 2 të tilla. Sipas strategjisë së hartuar thuhe se veç shkurtimit të mëtejshëm të procedurave koha për marrjen e një leje ndërtimi nga 436 ditë do të reduktohet në 35 ditë, koha për furnizimin me energji elektrike nga 177 ditë do të reduktohet në 45 ditë, koha për regjistrimin e pronësisë, nga 33 ditë reduktohet në 13 ditë, koha për pagesën e taksave nga raportimi on line reduktohet me 125 orë. Një pjesë e rëndësishme e kësaj strategjie është për procedurat doganore të eksport-importit, ku flitet për reduktimi i kohës për eksport nga 19 ditë në 4 ditë, reduktimi i kohës për import nga 18 ditë në 3 ditë, reduktimi i numrit të dokumenteve për eksport nga 7 në 3, reduktimi i dokumentove për import nga 8 në 4 ditë. Po kështu zbatimi i kontratave sipas kësaj strategjie flet për reduktimin e afateve kohore të procesit gjyqësor si dhe reduktimin i procedurave. Një lehtësim i tillë i procedurave të biznesit do të japë mundësi që të tërheqë më shumë investitorët e huaj në vendin tonë, duke e bërë Shqipërinë tërheqëse dhe po ashtu t’u japë mundësi sipërmarrësve të rinj dhe ata që guxojnë të hynë në botën e biznesit ta kenë më të lehtë nga ana burokratike të nisin sipërmarrjen e tyre të re.