Të rehabilitosh administratën e mitingashëve të PD-së

Ekonomitë, ashtu si individët, janë sisteme komplekse, mosfunksionimi i një sistemi mund të sjellë një zinxhir dështimesh në pjesë të tjera të ekonomisë.

Në 25 vjet kemi qenë dëshmitarë të një shteti pa drejtim, të një shteti që pas 25 vjetëve po jepte shpirt sepse asnjë hallkë e tij nuk funksiononte. Çdo ditë që kalon na vërteton se asnjë reformë, asnjë progres nuk mund të jenë të qëndrueshme, pa ndërtimin e një sistemi bindës të sundimit të ligjit. Kjo është pika Zero, pika e nisjes e të bërit shtet.

Me shpresa të mëdha po presim shtatorin. Por shtatori për socialistët përbën edhe fillimin e një ristrukturimi të kaher-pritshëm të strukturave të partisë. Zgjedhjet e qershorit lanë një shije të hidhur për PS e Shkodrës dhe debati i flaktë i mbledhjes së fundit të strukturave të PS Shkodër, nxorri në shesh shumë të vërteta që më shumë qarkullonin tavolinave apo ishin veçse zëra që askush nuk i dëgjonte.

PS në mbarë vendin është në fazë tranzicioni, ky tranzicion që nuk po i ndahet vendit tonë ka përfshirë edhe partinë më të madhe në vend dhe është e pritshme që problemet dalin kur je në qeverisje, sepse aty shihet qartë sa funksionon binomi kontribues/përfitues.

Normal që me shtatorin do rifillojnë riorganizimi dhe rishikimi i listave të anëtarësisë, një gjë shumë e rëndësishme në këtë rishikim listash duhet patur parasysh, anëtarësimet e vjetra, e them këtë sepse është një dukuri që po vërehet shumë që nën etiketimin e politikave përtej së majtës e së djathtës po harrohen kontribuesit e vërtetë, ata që deri dje ishin në ballë të protestave, ata që vetëm se kishin deklaruar se bënin pjesë në PS ishin të papunë. Dhe sot mund të bëhet gabimi që nën rregjistrimet e reja të barazohen militantët e PS me njerëz të cilët asnjë ditë nuk kanë milituar në PS.

Dua të ndalem te punësimet, gabimisht paragjykohen militantët e PS se po kërkojnë shpejt të punësohen, në një kohë që qeveria ka veç dy vite qeverisje, në një kohë që administrata ka vendet e limituara. Pa dashur të bëj asnjë krahasim me qeverisjen e Berishës sepse nuk është aspak llogjike të krahasosh shtetin me antishtetin, po ngre pyetjen: Si mundet administrata e mitingashëve të PD sot të rehabilitohet në emër të ideologjisë përtej së majtës dhe të djathtës? A mund të krahasosh njerëz të cilët pavarësisht ‘dengjeve’ të letrave që kanë nuk kanë njohuri të përgjithshme që t’i ofron shkolla e mesme. Siç thotë një mik i imi, duhet më parë t’i kërkosh dëftesën e shkollës së mesme çfarë mesatareje kanë, se letra kanë me shumicë.

Nuk ka ligj që mbron të paaftin, dhe në administratën e korruptuar të Berishës (sepse pak ose aspak ka ndryshuar) vazhdojnë e vegjetojnë shumë të paaftë duke mos ja hapur rrugën të aftëve dhe atyre që nuk ju dha kurrë mundësia për tetë vite me rradhë (tashmë janë bërë dhjetë). Nëse ne bëjmë një krahasim të dytë me aleaten tonë, që mori 260.000 vota në rang kombëtar në zgjedhje lokale (duke ngushtuar ndjeshëm edhe diferencën me PD), në bashkinë Shkodër doli forcë e dytë duke e nxjerrë PS forcë të tretë (po ashtu edhe në rang qarku). Pavarësisht na pëlqen apo jo, LSI diti të joshë elektoratin e vet. Ka deputetë të Shkodrës që nuk i shohin punësimet si kriter madhor të humbjes në Shkodër,por personalisht mendoj se nuk ka më keq se i zhgënjyeri të cilin e ke përdorur per tetë vjet dhe sot nuk i jep as shpresë. Idealizmat ekzistojnëkur mvishen me gjëra konkrete, bindjet vazhdojnë dhe e mbajnë në këmbë PS e Shkodrës, por për sa kohë?

Të mbështetësh njerëzit që të dhanë mundësinë të qeverisësh, të bësh reforma, të krijosh shtet, është mirënjohje e cila të kthehet në dyfish mbështetje. Angazhimet shoqërore janë angazhime individuale, dhe çdo militant i PS që e ka vuajtur mbi kurriz regjimin e Berishës bashkë me familjen e vet, sot meriton minimalisht më tepër respekt.

Në një shoqëri të emancipuar roli i deputetit është të ruajë ekuilibrat e ketij raporti duke ju pergjigjur njëkohësisht edhe elektoratit që e ka votuar. Deputetët nuk janë punëdhënës, por duhet të mbrojnë interesat e elektoratit që perfaqësojnë, duke ngritur zerin aty ku ka emërime të pamerituara, sepse pas çdo emërimi pa meritë fshihet djersa dhe mundi i shumë kontribuesve të tjerë, të cilët kanë besuar dhe besojnë në punësimin e drejtë.

Ka me dhjetra njerëz të aftë që votuan apo kontribuan për PS-në, me diploma për t‘u pasur zili, njerëz të cilët “u harruan” me qëllim nga administrata e Berishës, nën etiketimin se janë socialistë. Eshtë vërtetë e çudishme (duhet ta rendisim në listën e gjatë të çudirave shqiptare) kur njerëz të administratës së Berishës, që deri dje keqtrajtuan me qindra socialistë, që u përfolën për paaftësi, sot vazhdojnë e mbajnë pozicione kyçe, thjesht duke ndërruar parti.

Kam qenë dhe jam e mendimit se të paaftët (të djathtë apo të majtë qofshin) i druhen konkurrencës dhe janë personat më të gatshëm të korruptohen. Një llogjikë deduktive do na çonte se kujt i shërben vendosja e të paaftëve. Nuk jam dakort me disa që thonë se kanë humbur pikat e referimit të elektoratit; Personat e paaftë e të korruptueshëm nuk kanë zgjedhje të majta apo të djathta, janë jashtëzakonisht të aftë t’u mbijetojnë ndërrimit të sistemeve…

‘Fatkeqësisht’ për politikanët, por fatmirësisht për transparencën, ne jetojmë në qytete relativisht të vogla ku të gjithë njohin njeri-tjetrin. Qeveria që iku na la pas një administratë ku vazhdojnë të mbijetojnë njerëz mediokër e të korruptuar, duke krijuar një stereotip të aftësuar në mbijetesën e përshtatjes ndaj shefit të rradhës. Të ndryshosh këtë stereotip përbën një sfidë, që po na rezulton shumë e ngadaltë. Në një kohë që kontribuesit e PS shohin me habi dhe dëshpërim sesi po punësohen mitingashët e rilindur të PD.

Shtatori sjell me vete edhe stuhitë e llogaridhënies, megjithatë llogaria e parë duhet dhënë nga ata që e çuan PS e Shkodrës në këtë gjendje. Shumëkush ka pjesen e vet të fajit, por më tepër se të krijosh një gjueti shtrigash do ishte më dobiprurëse për PS dhe strukturat e Shkodrës që gjithsecilit t’i vëmë “kapelen që i takon”, nëse në drejtim vendosen njerëz të paaftë, apo njerëz që s’kanë asnjë farë lidhje me PS, apo njerëz të cilët nuk kanë kontributet, nuk është faji i drejtuesit por i atij qe i ka vënë apo emëruar këta drejtues. Etiketimet ky është i X dhe ky i Y nuk i shërbejnë askujt, por veçse çojnë ujë tek mulliri i Berishës.

Partia Socialiste është një parti gjithëpërfshirëse ku si bërthamë e saj janë njerëzit me bindjet e majta dhe me vizion. Shumë janë përpjekur që Shkodrën ta paraqesin si të djathtë, por e vërteta është se sa herë nuk ka funksionuar PS e Shkodrës, aq herë ka fituar PD. Ashtu sic ndodhi edhe me zgjedhjet e fundit ku PS u përdor si aksesor. Kushdo që është përpjekur ta kthejë PS në parti individuale apo ta dublojë, ka marrë faturën e kripur. Zgjidhjet gjithmonë ekzistojnë, çështja është sesa të predispozuar jemi të krijojmë një PS që drejtimet e problematikave të ndryshme të kalojnë nga poshtë lart dhe jo inversë; Sa të predispozuar jemi që debatet që bëhen në bazë të kthehen në debate konstruktive që meritojnë vëmendje dhe zgjidhje; Sa të predispozuar jemi që të mos bëjmë gabimet e së shkuarës… Ristrukturim është një fjalë që kërkon kujdesin dhe metodat e duhura, duke u mbështetur tek sllogani “t‘i gjejmë punës njerëzit dhe jo njerëzve punën” që pavarësisht dëshirës së mirë nuk funksionoi si duhet, po sugjeroj një sllogan tjetër “Garancia janë njerëzit”.