Shkon në 4 numri i të vdekurve në gjykatën e Milanos, kapet autori

Borxhet dhe një akuzë për falimentim të falsifikuar, duket se ka qenë shkaku i cili ka shtyrë Claudio Giardiello, 57 vjeç, të hapë zjarr mëngjesin e sotëm duke lënë të vdekur 4 persona.

Viktimat janë, gjyqtari i çështjes Fernando Ciampi, avokati i tij, Alberto Appiani dhe Giorgio Erba që ka qenë i akuzuar në të njëjtën çështje.

Viktima e katërt, identiteti i të cilit nuk bëhet i ditur, duket se ka ndërruar jetë për shkak të një arrest kardiak.

I plagosur ndërkohë ka mbetur edhe nipi i Giardiello, Davide Limongelli, që është i akuzuar në të njëjtën çështje me xhaxhain e vet.

Claudio Giardiello ka një sërë precedentësh penalë për të njëjtin krim. Ai ka kryer një sërë falimentimesh duke trukuar bilancet, në mënyrë që të përfitonte nga mospagimi i taksave.

Autori është arrestuar në qytezën e Vimcerate, në afërsi të Monzës, pas një ndjekje nga policia.

Duket se objektivi i vrasësit ka qenë prokurori Gaetano Ruta, i cili ka shpëtuar.

Avokatët e mëparshëm, e kanë cilësuar si një njëri që nuk dëgjonte asnjëherë këshillat, dhe e klasifikonin si një paranojak.

Kohët e fundit, prokuroria e Milanos, i kishte sekuestruar një sërë pronash dhe apartamentesh në qendër të Milanos, duke dëshmuar kështu që paratë e falimentimeve, përdoreshin për investime në pasuri të paluajtshme.

Ndërkohë, pallati i drejtësisë është evakuar nga policia, deri në zbardhjen e plotë të ngjarjes./DITA