Terror në Ministrinë e Mbrojtjes, të gjithë në përgjim

Terror në Ministrinë e Mbrojtjes, të gjithë në përgjim

Bërja publike e letërkëmbimit të Edvin Kullurit, sekretarit të Përgjithshëm të Ministrisë së Mbrojtjes me Gjeneral Xhemal Gjunkshin dhe refuzimi i këtij të fundit për tjetërsimin e Shtëpisë Qendrore të Ushtrisë, me gjithë përkujdesjen e veçantë të Arben Imamit, ka krijuar një situatë të vështirë e të tensionuar në Ministrinë e Mbrojtjes. Ushtarakët nuk kanë se ku të ankohen, Komandanti i tyre i Përgjithshëm, Bujar Nishani, është pozicionuar hapur në mbështetje të aferës, duke i lënë të gjithë në baltë. Shtabi i Përgjithshëm i Ushtrisë, pothuaj është në izolim të plotë, Drejtuesit e tij që tashmë shihen si armiq e të pa besë, janë pothuaj plotësisht të izoluar. Nëpër korridore e zyra, ligjin e bëjnë të besuarit e Imamit, dy civilët, njeri nga Tropoja me mbiemrin Berisha dhe tjetri nga Dibra, me mbiemrin Bunguri. Që nga mëngjesi i ditës së premte, Imami pothuaj gjatë gjithë ditës së punës është gjendur në zyrë, ndërsa drejtues e punonjës të SHIU-t tashmë i gjen ‘nëpër këmbë’ në skenarin e presionit për ‘armiqtë’ e deklaruar të Berishës dhe Imamit si dhe të pabindurit (inspektorë, shefa) që nuk pranojnë të ndryshojnë dokumente të ndryshme për të humbur gjurmët e skandaleve.

Janë nën kontroll të plotë të gjitha adresat elektronike të efektivave të Ministrisë së Mbrojtjes, ndërkohë, që nuk mund të ndiqen në internet (janë bllokuar) gazetat ‘Dita’ dhe ‘Shqiptarja.com’.

“Është një situatë e tillë që nuk mbahet mend në Ministrinë e Mbrojtjes, e njëjtë me atë që na mblodhi Imami pas 21 janarit e kërcënoi hapur se ushtria është gati të hapë zjarr. Ne ushtarakët jemi nën kontroll të plotë nga një dorë njerëzish të Imamit që kanë bërë e po bëjnë ligjin në Ministri. Tashmë, ata janë bërë si të tërbuar e përpiqen çfarë mund të fshehin në dokumentet e skandaleve të shumta. Refuzimi i Gjunkshit për të firmosur dhënien e Shtëpisë Qendrore të Ushtarakëve për godinë të PD, qe një goditje për Sali Berishën e Imamin, të cilët po përpiqen që të hakmerren sa të mundin në këto dit që u kanë mbetur. Përpiqen të mbulojnë skandalet që kanë bërë e që është e pamundur të mbulohen. Po bëhen presione dhe u kërkohen shkresa, urdhra personave që i kanë në administrim, me synimin për t’i falsifikuar apo zhdukur. Por kjo është e pamundur të bëhet. Po kuptohet se fshehtas, diçka po përgatitet nga të besuarit e Imamit për të mbështetur zaptimin e Shtëpisë Qendrore të Ushtrisë nga PD”- pohon një nga ushtarakët e Ministrisë së Mbrojtjes, me një karrierë 15 vjeçare në këtë institucion.

TERRORI NË MINISTRI

Terrori në ministri, sipas burimeve të ‘Dita’ ka filluar ditën e mërkurë, më datë 14.08.2013, në momenti që kërkesa e ardhur në zyrën e gjeneral Gjunkshit për kalimin e godinës së Shtëpisë së Oficerëve në godinë për PD, e ky refuzoi të firmosë, pasi ky veprim binte në kundërshtim të plotë me ligjet në fuqi. “Gjeneral Gjunkshi u konsultua me specialistët, me vartësit e tij të afërt dhe refuzoi të firmosë. Ky veprim i drejtë, miratohet nga të gjithë ushtarakët në këtë institucion. Ndërsa për Imamin dhe besnikët partiakë që bëjnë ligjin në këtë ministri, ky kundërshtim, erdhi i papritur dhe solli reagim të ashpër. Ishte ky reagim i tyre, deri nëpër korridore, (‘Keni për ta parë, do ua tregojmë vendin shumë shpejt tradhtarëve’, ‘Shtëpia Qendrore e Ushtrisë, çfarëdo të bëni, do i jepet PD-së’, ‘Të mos mendoj kush se mund të dalë kundër Sali Berishës se e di ku e ka vendin!’, etj) që dhe ne të tjerët të mësonim se çfarë kishte ndodhur. Dhe në fakt, më të besuarit e Imamit këtu, Bunguri dhe Berisha, njerëzit që janë në brendësi të gjithë asaj që ndodh në ministri, bashkë me pak të tjerë(civilë të shpërblyer në funksione si militantë) nuk po rrinë duarkryq. Ne ushtarakët, në mos plotësisht ‘armiq’ të gjithë, jemi të pabesueshëm. Na ndjekin kudo ku shkojmë, kë takojmë, çfarë bisedojmë. Ndërsa punonjësit e SHIU-t i kemi nëpër këmbë në çdo moment”- pohon kuadri i lartë në Ministrinë e Mbrojtjes për ‘Dita’. Në lidhje me sa më sipër, ai shton edhe detaje të tjera.

“Thash që refuzimi i Shefit të Shtabit të Përgjithshëm për të firmosur tjetërsimin e godinës së Shtëpisë Qendrore të Ushtrisë, ndoshta nuk pritej nga Imami e Berisha. Menjëherë, u urdhërua nga lart që ky refuzim (përgjigja e Gjunkshit) të mbahej tepër sekret, të mos mësohej as në ministri e jo më të dilte jashtë mureve të saj. Bëhej kjo për të gjetur një firmosën tjetër, siç edhe gjetën ditën e premte, por jo në ministri, por në Shtëpinë Qendrore të Ushtrisë. Por shkresa, megjithëse kishte rënë në duar të 2-3 personave, doli dhe u publikua mbrëmjen e së enjtes në TV e të premten në medien e shkruar. U shtua terrori. Funksionarët SHIU nisën menjëherë punën për gjetjen e personit që kishte nxjerrë shkresën e Gjunkshit. U thirr menjëherë nga shtëpia (ishte në dasmë) Luljeta, shefe e Sekretarisë së Ministrit të Mbrojtjes. U thirrën e po pyeten dhe disa persona të tjerë. Ne ushtarakët vijmë e ikim në punë, por shihemi vëngër… Thash se është një situatë tepër e vështirë”- shton funksionari i Ministrisë së Mbrojtjes.

GJITHÇKA NËN KONTROLL

Ushtarakët që kontaktuam na pohuan se përveç terrorit psikologjik, kontrollit fizik në çdo hap që hedhin, po përballen me një kontroll të vazhdueshëm deri të postave elektronike personale. “Kjo është bërë me kohë, por tashmë, një gjë e tillë bëhet hapur. Të premten, u miratua lista e studimeve për vitin e ri akademik (e pa publikuar ende). Pjesa më e madhe e të miratuarve janë fëmijë apo miq të të mëdhenjve të qeverisë e militantëve të pushtetarëve në ikje. Një miku im më shkruante në e-mail të interesohesha nëse djali i tij, një nga aplikuesit, kishte fituar. Në fakt, djali i tij, nuk është në listën e fituesve, ndonëse ishte ndër konkurrentët e parë gjatë testimit. I shkrova në e-mail dhe në formën e shakasë:’Pse, kërkon që të fitoj djali yt, kur ju njiheni si familje e majtë dhe ti ke qenë vëzhgues në këtë zgjedhje!?’. Çfarë ndodhi! Nuk kaluan as 5 minuta dhe në zyrë më vijnë njëherazi dy persona, njëri nga ata besnikët e ministrit dhe tjetri nga ata të SHIU-t. Më thanë se merrem me politikë, se isha besnik i Ramës e se nuk e kisha vendin në ministri e se këtë do e shikoja shumë shpejt. Kam frikë, për të mos thënë se jam i sigurt, se në një listë që thuhet se po përgatitet për daljen në lirim, do të jem edhe unë. Edhe pse me kritere ligjore nuk mund të më heqin, ata do të hakmerren, siç kanë bërë këta 8 vite me dhjetëra kolegë të mijë”- na tregoi i revoltuar ushtaraku specialist i Ministrisë së Mbrojtjes. Ai, por dhe kolegë të tij, të revoltuar për këtë terror, na pohuan gjithashtu se me miratim të krerëve të ministrisë, gazeta ‘Dita’ dhe një tjetër, nuk mund të lexohen në internet në Ministrinë e Mbrojtjes, pasi janë bllokuar prej kohësh në ordinatorin e qendrës së institucionit. Ndërkohë, gazetat ‘55’, ‘RD’, ‘Standart’ e ndonjë tjetër, jo vetëm janë të lira për lexim elektronik, por shpesh, nga servilë e të pa aftë, militantë partiak të afruar në këtë ministri pa kritere, mbahen publikisht dhe në tavolinat e punës e mjedise të tjera të ministrisë.

MBULIMI I SKANDALEVE

Skandali me Shtëpinë Qendrore, nxitimi me çdo kushte e mjet për të gjetur një pikë ku të kapen për justifikim (gjë e cila është e pamundur pasi minimalisht, çdo veprim për tjetërsimin e Shtëpisë Qendrore kërkon domosdo firmën e Shefit të Shtabit të Përgjithshëm), ishte një ‘barrë’ tjetër për mëkatarët e tenderave të shumë përfolur në Ministrinë e Mbrojtjes. Të gjendur para humbjes së rëndë të pushtetit nga PD që i ka sjellë në ministri si militantë, këta mëkatarë të Imamit e Berishës, po përpiqen që të falsifikojnë deri dhe dokumente zyrtare për të fshehur skandalet e shumta. “Është shpallur me nxitim një tender me ankand për shitjen e disa pajisjeve të Uzinës Ushtarake ën Tiranë dhe pritet të zhvillohet. Më kërkojnë  me ngulm që të hartoj dokumentet e plota dhe ta mbyll këtë problem. Them ta mbyll se në fakt, materialet që duhet të shiten për skrap (torno, çekiçë pneumatikë, etj…), në fakt nuk janë verifikuar fizikisht, pasi janë shitur me kohë e paratë nuk dihet në çfarë duarsh kanë shkuar. Më thonë se duhet mbyllur me urdhër të ministrit. Por kjo nuk mund të bëhet. Më kanë kërcënuar, më kanë fyer, por… Ka rrezik të më largojnë nga puna, ose të më lajmërojnë dhe në vendin tim të firmosë një nga besnikët e tyre. Çfarë nuk është bërë në këtë institucion këto vite! Nëse do të bëhet një audit i pa anshëm, gjë të cilën shpresoj ta bëjnë drejtuesit e rinj të ministrisë, këtu do të mësohen skandale e abuzime nga më të rëndat me djersën dhe mundin e popullit. Këto dit, vetëm për këtë po punohet në institucion. Si specialist, pohoj një gjë, se sado që po përpiqen këto dit të ndryshojnë dokumentet, është e pamundur të fshihet ajo që ka ndodhur”- pohon specialisti i logjistikës për gazetën ‘Dita’…

PLANI PËR SHTËPINË QENDRORE

Pas përpjekjeve të fundit për ‘qepjen’ tjetërsimit të Shtëpisë Qendrore të Ushtrisë, (gjetën firmën e një Breçani në këtë institucion!?), njerëzit e Berishës dhe Imamit në ministri, të hakërryer por dhe si triumfatorë, dekonspirojnë dhe një plan për zhvendosjen e PD në godinën e  ushtarakëve. “Një prej tyre, pasditen e së premtes në korridor më tha: ‘Është punë ditësh dhe ne(ndonëse janë të depolitizuar) të PD-së do të shkojmë në godinën që na dha Sali Berisha. Nuk keni ç’na bëni as ju, as ushtarakët që dalin në protesta, e as Edi Rama’. Sipas tij, ndoshta nga data 20 e këtij muaj, apo më pas, do të ketë një veprim të tillë. Orët e fundit në ministri janë parë dhe funksionarë të PD-së dhe të Ministrisë së Brendshme. Ushtarakët në institucion janë të revoltuar, por të pafuqishëm për të përballuar këtë presion militantësh në institucion”-na pohoi një nga kuadrot madhorë në Ministrinë e Mbrojtjes.

SHTABI I PËRGJITHSHËM

Refuzimi i firmës nga Gjeneral Xhemal Gjunkshi për kalimin e godinës së Shtëpisë Qendrore në seli të PD-së, e ka bërë Shtatmadhorinë ‘çerdhe të pabesueshme’ për ministrin Arben Imami e njerëzit e tij. Në fakt, ushtarakët e Shtatmadhorisë dhe ata në bazë, ndjehen të tradhtuar nga Bujar Nishani, që është dhe Komandant i Përgjithshëm i Forcave të Armatosura. Ishte pikërisht ky person që në përmbushje të detyrës së tij Kushtetuese, duhej të bëhej barrikadë e këtij skandali, të mbështeste gjeneral Gjunkshin. Por ai nuk e bëri. Burime të besueshme në ministrinë e Mbrojtjes pohuan se pritet së shpejti firmosja e një liste nga Imami para ikjes së qeverisë aktuale në shtator. Ndoshta, një pjesë e mirë e të ndëshkuarve do të jenë oficerë të Shtatmadhorisë(nomenklatura e Ministrit të Mbrojtjes)që do të ndëshkohen. Ndërkohë, Shtabi i Përgjithshëm, pas skandalit Berisha-Imami me Shtëpinë Qendrore të Ushtrisë, në fakt, ndodhet i ‘rrethuar’.

Ndërsa Gjunkshi, në përputhje me funksionin që ushtron, pohon se nuk ka gjë tjetër për të thënë, pasi qëndrimin e tij lidhur me tjetërsimin e Shtëpisë Qendrore të Ushtrisë, e ka thënë zyrtarisht. “Unë kam bërë detyrën, kam shprehur zyrtarisht qëndrimin e Shtabit të Përgjithshëm, që është në përputhje të plotë me lidhet e shtetit”- pohon ai.

Redaksional

MBAHU KOMANDANT!

I dashur Komandant i Përgjithshëm i Forcave të Armatosura, Bujar Nishani. Institucioni i Presidentit të Republikës, në frymën Kushtetuese të vendit, përfaqëson rangun më të lartë të pjekurisë politike, nivelin e përfaqësuesit që qëndron mbi palët. Por përfaqëson dhe Komandantin, që jo vetëm mban në vend nderin dhe dinjitetin e ushtrisë, por larg-qoftë, në rast lufte, i del për Zot këtij vendi. Nuk kemi fare ndërmend të të tregojmë detyrën kushtetuese dhe të të bëjmë moral, por thjesht po të ftojmë të na gjesh një shembull të ngjashëm të asaj që ka ndodhur me SHQUP-in në ndonjë vend apo shtet tjetër të kontinentit Evropian. Një shembull tjetër kur Komandanti i Forcave të Armatosura, ua shet “lëkurën” vartësve të tij ushtarakë sa hap e mbyll sytë, ku me firmë dhe vulë një President, një Komandant i Përgjithshëm i Ushtrisë në kundërshtim me të gjithë orientimet dhe frymën që i vjen nga gjeneralët dhe Shtabi i Ushtrisë, firmos një dekret që barazon vullnetin institucional të Shtabit të Ushtrisë me kapriçon dhe planet për të ndërtuar kulla të një partie politike. Nuk kemi pasur asnjë dilemë i dashur Komandant se të zgjodhën pikërisht ty si President bash për të bërë si të donin. Por asnjëherë nuk mund ta imagjinonim se do të të shpërdoronin deri duke të detyruar të veproje dhe të firmosje për pronat njësoj siç detyrojnë Ben Qirjakon e hipotekave. Komandant, në Shtabin e Përgjithshëm dhe Ministrinë e Mbrojtjes prej 72 orësh ushtarakë të të gjitha niveleve janë nën terror. Janë vartësit e tu Komandant. As na rren mendja se do interesohesh ndonjëherë për këta ushtarakë Komandant, madje jemi të sigurt se shumë shpejt mund të jesh prapë ti që do dekretosh lirimin e tyre nga detyra. Këto ditë na dhe rastin të shohim Komandantin e Përgjithshëm të Ushtrisë të firmosë njësoj si një drejtor hipoteke, për ditët në vijim kemi vetëm një lutje për ty Komandant: Urojmë që të mos të të shohim duke bërë GATI-TU përpara Flamur Nokës. MBAHU KOMANDANT, se tjetër gjë s’të ka mbetur për të bërë…