Teuta ka arritur sigurinë matematike për kualifikimin në Europa League, pasi ka mundur dje Laçin, me golin e shënuar në pjesën e dytë nga Tefik Osmani. Tri pikët e kanë çuar Teutën në vendin e dytë, por më e rëndësishmja është se e kanë bërë të pakashëm nga Flamurtari i vendit të katërt. Diferenca është gjashtë pikë dhe, edhe nëse vlonjatët i fitojnë dy ndeshjet e mbetura dhe Teuta humbet të fundit në Berat, me pikë të barabarta kualifikohen durrsakët, pasi janë superiorë në takimet direkt. Në Durrës, Teuta ka fituar 2-1, në Vlorë ka barazuar 1-1, në ndeshjen që komprometoi keq synimet evropiane të Flamurtarit. Këtij të fundit tani i mbeten vetëm shpresa teorike për të arritur Kukësin. Në vendin e tretë pas fitores së djeshme të Teutës, kuksianët kanë katër pikë më tepër se Flamurtari. Skuadra debutuese e Kategorisë Superiore është fare pranë Evropës dhe i duhen dy pikë në dy takimet e fundit për ta siguruar matematikisht, gjithmonë në rast se Flamurtari merr maksimumin. Në letër, kalendari i kuksianëve duket më i vështirë se i vlonjatëve, pasi Kukësi sot luan jashtë, ndërsa Flamurtari pret Vllazninë. Në takimin e fundit, Flamurtari luan me Apoloninë në Fier, ndërsa kuksianët presin Skënderbeun, skuadrën më të fortë, por tashmë kampion sigurisht jo një ndër simpatizantët e vlonjatëve, një faktor që duhet marrë fort parasysh. Për të mos lënë pikëpyetje, Kukësi do të kërkojë që sot tri pikët, për t’i dhënë fund edhe kësaj gare. Kukësi e Flamurtari janë të vetmet të mbetura në garë, pasi Tirana nuk ka më asnjë shans, gjashtë pikë poshtë vendit të tretë, me të cilin i ka humbur të dyja ndeshjet.
Kategoria Superiore
JAVA E 25-të
Dje
TEUTA – LAÇI 1-0
Osmani 63′
Sot, ora 17:00
Skënderbeu – Luftëtari
Kastrioti – Kukësi
Flamurtari – Vllaznia
Besa – Apolonia
Tirana – Bylis
Shkumbini – Tomori
Renditja
P Skuadra F B H Gol. Pikë
1 Skënderbeu 17 4 3 39:10 55
2 Teuta 14 6 5 31:20 48
3 Kukësi 13 7 4 42:22 46
4 Flamurtari 12 6 6 46:31 42
5 Tirana 11 6 7 28:22 39
6 Laçi 11 4 10 32:31 37
7 Vllaznia 10 5 9 27:23 35
8 Kastrioti 10 4 10 26:31 34
9 Besa 8 6 10 21:25 30
10 Bylis 9 5 9 30:27 29
11 Shkumbini 5 8 11 14:31 23
12 Luftëtari 5 4 15 23:41 19
13 Tomori 3 7 14 24:47 16
14 Apolonia 1 8 15 15:39 11