Hashim Thaçi dhe Ramush Haradinaj pritet të finalizojnë brenda disa ditësh hyrjen e Aleancës për Ardhmërinë e Kosovës në qeveri. Sipas gazetës kosovare “Express”, e cila i referohet një burimi pranë qeverisë, detajet e marrëveshjes do të finalizohen gjatë takimeve kokë më kokë të dy liderëve.
Të premten Haradinaj u shfaq i hapur për bashkëpunim, ndërsa për nder të tij, Thaçi vazhdoi organizimin e pritjeve institucionale. Ramush Haradinaj nuk e ka mohuar se AAK-ja do të hyjë në bashkëqeverisje me PDK-në. Për koalicionin me Partinë Demokratike, Haradinaj ka thënë se ende nuk ka ndonjë zhvillim dhe ka premtuar se në momentin që të arrihet diçka do t’i informojë qytetarët e Kosovës.
“Ju thashë se një gjë të kemi të qartë, ne kemi marrë përgjegjësi për të ndihmuar proceset nacionale, procesin e dialogut. Në tema të tjera nuk ka ndonjë zhvillim, kurdo që të ketë do të kemi kënaqësinë dhe nderin t’i informojmë qytetarët e vendit”, ka thënë Haradinaj.
Zyrtarë të lartë të dy partive kanë konfirmuar se marrëveshja në parim tashmë ekziston, por detajet do të sqarohen brenda disa ditësh. “Këtyre ditëve pritet që Thaçi dhe Haradinaj të takohen dhe ta sqarojnë plotësisht këtë çështje”, ka thënë një zyrtar i afërt me bisedimet që po zhvillojnë dy partitë.