Titulli, Skënderbeu zgjat duart

Dy rezultate minimale në favor të skuadrave vendase në Korçë e Tiranë i kanë dhënë praktikisht fund garës për titull, në favor të Skënderbeut. Skuadra kampione ka mundur 1-0 Besën, me golin e shënuar nga Pero Pejiç, ndërsa Partizani ka fituar me të njëjtin rezultat me Kukësin, falë golit të Migen Memellit. Pas këtyre ndeshjeve, diferenca midis vendit të parë e të dytë ka shkuar në tetë pikë, kur kanë mbetur edhe katër javë për t’u luajtur. Teorikisht, Kukësi ende ka shanse, pasi kryesuesit do të luajnë jashtë kundër Teutës e Partizanit, ndërsa midis tyre do të jetë ndeshja direkt, në Korçë, por vështirë se skuadra më e mirë e vendit të zhytet përsëri në krizë si kjo që kaloi dhe të humbë aq shumë terren. Takimi i djeshëm, edhe pse i lehtë në letër, ishte një thikë me dy presa përballë Besës që lufton për mbijetesë, aq më tepër që skuadra e Josës vinte nga tri humbje radhazi, të cilat kishin rënduar situatën psikologjike. Besa u përpoq ta shfrytëzonte, por gjithçka u prish pas vetëm gjysmë ore lojë, kur Fejzullahu doli me karton të kuq dhe i la kavajasit me dhjetë lojtarë. Në inferioritet numerik skuadra e Artan Mergjyshit nuk ishte në gjendje të bënte shumë, edhe pse rezistoi deri në minutën e 54-të, kur Pejiç shënoi golin e avantazhit. Ishte i vetmi i takimit dhe Besa nuk ishte në gjendje të rrezikonte fitoren e Skënderbeut, që tani merr frymë lirisht dhe feston Pashkët duke zgjatur duart tek titulli i katërt radhazi dhe i pesti gjithsej në historinë e tij.

Ndërkaq, në stadiumin kombëtar “Qemal Stafa”, Memelli shënon një supergol që zgjon Kukësin nga ëndrra, por edhe mban gjallë ëndrrën evropiane të Partizanit. Edhe pse secilës prej skuadrave i duhej fitorja ato e nisën qetë takimin, duke mos dashur të pësonin ndonjë gol që do të komprometonte gjithçka. Në minutën e njëzetë ishte Nexhipi që rrezikoi i pari, duke gjuajtur mbi tra, ndërsa përgjigjja e Kukësit erdhi me Cikalleshin. Dhjetë minuta më pas, Nexhipi fiton një goditje dënimi, të cilën e ekzekuton Memelli dhe shënon për Partizanin. Përsëri Cikalleshi rrezikon për Kukësin, të cilit i mohon golin portieri Alban Hoxha. Kukësi u shfaq zhgënjyes pas pushimit, kur ishte i pafuqishëm për të ekuilibruar rezultatin. Lojë e ngadaltë dhe e lexueshme, çka bënte që mbrojtja e Partizanit të mos lejonte rreziqe. Në dhjetë minutat e fundit Partizanit luajti me dhjetë lojtarë, por përsëri Kukësi nuk ishte në gjendje të imponohej, madje të kuqtë patën më tepër iniciativë, duke parë nga porta kundërshtare. As pesë minutat shtesë nuk patën vlerë për miqtë, të cilët humbën betejën kryesore dhe ndoshta edhe luftën e titullit, ndonëse do të ishte e gabuar sikur të quhej një dështim. Nga ana tjetër, Partizani ka konsoliduar pozitat në zonën evropiane dhe kjo është pa dyshim një arritje për skuadrën e sapokthyer nga Kategoria e Parë.

Kategoria Superiore

Java e 29-të

 Të shtunën

Tirana-Bylis         3-0*

Kastrioti-Vllaznia   2-4

Doku 22′, Caca 67′ (p) / Kruja 8′, Tafili 43′, Shtubina 58′, Bushiç 82’

Dje

Lushnja-Flamurtari   2-3

Gjoni 40′, Mihani 85′ / Abilaliaj 3′, Shehaj 22′, Lena 75′

Laçi-Teuta           1-0

Nimani 35’

Partizani-Kukësi           1-0

Memelli 30’

Skënderbeu-Besa      1-0

Pejiç 54’

* Në tavolinë

Renditja

 N  Skuadra      P    Gol  F    B    H

1  Skënderbeu   57   42:24 17   6    6

2  Kukësi       49   34:30 14   7    8

3  Partizani    47   27:20 13   8    8

4  Laçi         44   30:26 13   5    11

5  Teuta        42   36:33 10   12   7

6  Vllaznia     41   39:31 11   8    10

7  Flamurtari*  41   37:35 12   8    9

8  Tirana       40   26:26 11   7    11

9  Besa         35   28:29 9    8    11

10 Kastrioti    29   23:34 8    5    16

11 Lushnja      26   29:45 7    5    17

* Flamurtari -3 pikë, Bylis i përjashtuar