Tokio dhe Florida nën ujë, NASA paralajmëron katastrofën e pashmangshme

Ekspertë të NASA-s njoftuan të mërkurën se brigjet e botës  padyshim që do të jenë ndryshe në vitet e ardhshme. “Jemi të sigurt se do të ketë një shtim me më shumë se një metër të nivelit të detit duke u bazuar në ngrohjen që kemi pasur deri tani”, pohoi shkencëtari Steve Nerem. “Është e mundshme që situata të përkeqësohet në të ardhmen”, shtoi ai. Akullnajat e Groenladës dhe Antarktidës po shkrihen më shpejtë se kurrë dhe oqeanet po ngrohen.

Sipas Michael Freilich, drejtor i Divizionit të Shkencave Tokësore të NASA-s rritja e nivelit të detit do të ketë “impakte të thella” në të gjithë botën. Kështu vendet e ulëta të Shteteve të Bashkuara, si Florida, mund të zhduken ashtu si dhe disa prej qyteteve kryesore të botës si Singapori dhe Tokio. “Mund të fshijë tërësisht disa vende ishuj të Paqësorit”, shtoi shkencëtari. Të dhënat e NASA-s tregojnë se oqeanet e botës kanë shtuar mesatarisht rreth 7.6 cm që prej vitit 1992.

NASA gjithashtu publikoi një video me të dhënat e marra nga satelitët e saj, ku shihet qartë me anë të gradacionit të ngjyrave se si është prekur çdo cep i botës në 23 vitet e fundit. Zonat më të prekura janë brigjet e Paqësorit, Azisë dhe Oqeanisë ashtu si dhe Mesdheu Lindor dhe bregu atlantik i Amerikës.

Shkencëtarët janë të shqetësuar në veçanti për shtresat e akullit të Groenlandës që ka humbur mesatarisht 303 gigaton akull në vit në dekadën e fundit. Arsyeja kryesore e rritjes së nivelit të oqeaneve dhe deteve është ngrohja globale, e shkaktuar kryesisht nga aktiviteti njerëzor. Shkencëtarët paralajmëruan se, edhe nëse do të merreshin masa për të kthyer situatën dhe tendenca të ndryshonte, do të duheshin shekuj për të arritur një kthimin në nivelet para ndryshimeve klimatike. /DITA