Tom Doshi aksioner në një kompani me Dritan Priftin

Pas akuzave të ashpra të deputetit Tom Doshi në drejtim ët Kryetarit të Kuvendit, shumë prej qytetarëve pyesin se ku mund të jetë baza e konfliktit midis tij dhe Ilir Metës.

Tom Doshi rezulton mik i ngushte me një “armik” të hershëm të Ilir Metës, Dritan Priftin.

Doshi dhe Prifti, rezultojnë aksionerë në një shoqëri të përbashkët, që merret me prodhim dhe shitje vezësh. Por aktiviteti i shoqërisë në fjalë nuk është vetëm pularia. Kjo kompani ka si objekt të sajin edhe import-eksportin e produkteve bujqësore; bazën ushqimore për blegtori, por edhe tregtimin e mallrave e materialeve me karakter publik; farmaceutik; stomatologjik; të mobiljeve, kuzhinave, elektroshtëpiakeve; detergjentëve, produkteve kozmetike, bimëve medicinale; artikujve të ndriçimit; hidrosanitare; restorante; bare; shërbime hotelerie dhe turistike; veshje dhe konfeksione, etj”, thuhet në formularin e shoqërisë të regjistruar në QKR.

Në QKR, kompania është regjistruar në prill 2014 dhe selinë e saj e ka në Koplik. Aksionerë të saj janë: Tom Doshi 35%, Petrit Maho 30%, Dritan Prifti 25% dhe Klodjan Mema 10%.

Ndërkohë është i njohur dhe konflikti midis Dritan Priftit dhe Ilir Metës.