Kryetarja e Parlamentit , Jozefina Topalli, ka bërë sot një analizë vjetore të punës së institucionit ligjvënës në një konferencë për shtyp. Topalli tha se 2012-a ka qenë një vit i suksesshëm për punën e Parlamentit dhe theksoi se i vetmi aspekt negativ ishte mosvotimi nga ana e opozitës i tre ligjeve të kërkuara nga KE.
“Pas 18 shtatorit, pas miratimit të ndryshimet kushtetuese, opozita nuk dha miratimin për pr/ligjin për Gjykatën e Lartë, nëpunësin civil dhe reformën parlamentare duke bllokuar statusin. 3 ligje që Komisioni Europian i vuri kush për marrjen e statusit të vendit kandidat për në Bashkimin Europian”, tha Topalli.
Më tej, kryetarja e Parlamentit shtoi se ligjet me 3/5 do të jenë në Parlament dhe do të jenë shqiptarët ata që do t’i kthejnë përgjigje opozitës në 23 qershor për mosvotimin e tyre.
Madje, Topalli shkoi më tej, kur krahasoi kreun e opozitës me disa prej figurave që historia i ka njohur si njerëz që kanë punuar kundër interesave të kombit.
“Historia jonë ka njohur Hamza Kastriotin, Haxhi Qamilin, njerëz që janë bërë pengesë të zhvillimit dhe ecjes përpara. Ne kemi qene të fundit për të kapërcyer sistemin diktatorial. Haxhi Qamilët janë krijesa shqiptare, edhe sot gjendet një që e pengon Shqipërinë. Kjo nuk ndodh kurrë me forca të mëdha politike, që një lider të mos lejojë të votojë për ecjen përpara të vendit. Nuk fajësoj deputetët e opozitës që për ligjet e tjera ishin të lirë”, tha Topalli.