Topalli nuk kursehet në dhurata

Mungesa e lekëve në një vit të vështirë, nuk e ka penguar kryeparlamentaren që të shpenzojë për udhëtime dhe për shpenzime të ndryshme luksi. Me çeljen e buxhetit të ri, Kryetarja e Kuvendit ka menduar që në fund të mandatit të saj të dytë të tregohet dorëlëshuar përsa u përket shpenzimeve pa kufi gjer në dhurata. Në pamundësi për të dhënë dekorata apo medalje, pasi ligji i ri për dekoratat nuk është miratuar ende, Kryetarja e Kuvendit ka vendosur që të blejë dhurata për personalitetet që do të vizitojnë Shqipërinë, shkruan gazeta “Shekulli”. Kryeparlamentarja njihet për afeksionin që ka ndaj objekteve tradicionalë dhe në veçanti për veshjet. Edhe në dhuratat e parashikuara për t’ia dhuruar gjatë takimeve me personalitet e huaja brenda apo jashtë vendit, janë menduar elementët tradicionalë shqiptar të mungonte edhe Shkodra, vendlindja e saj. Kuvendi ka porositur 9 copë korniza ku ekspozohet jelek tradicional i punuar në argjend, punim filigrani, e vendosur në kuti druri me veshje kadifeje; pjata argjendi, punim filigrami, e vendosur ne kuti druri me veshje kadifeje si dhe pjata argjendi, ku është punuar legjenda e Rozafës së Shkodrës, pamje nga pjesa historike e Shkodrës dhe vallja tradicionale tiranase, të vendosura në kuti druri, veshje kadifeje etj. Në suveniret që do të blihen do të jenë dy buste të Heroit tonë Kombëtar, Gjergj Kastrioti Skënderbeu, të cilat do të jenë të punuara në argjend, vendosur në kuti druri me veshje kadifeje. Dy korniza të tjera do të blihen ku në njërën do të ekspozohet veshje e vjetër tradicionale e zonës së Mirditës, përmasat 70 cm x 40 cm dhe kornizën tjetër, do të ekspozohet varëse e vjetër tradicionale e zonës së Mirditës, e vendosur në kuti druri me veshje kadifeje, përmasat 60cm x 40cm.

Ndërkohë, Topalli nuk kursehet as për fotot. Pavarësisht se Kuvendi ka një ekip fotografësh dhe kameramanësh, kryeparlamentarja nuk heziton që të shpenzojë lekët e buxhetit të Kuvendit për foto. Në një nga aktivitet e zhvilluara në datë 10 dhjetor, është përdorur shërbimi i një prej studiove më të vjetra fotografike në kryeqytet. Sipas faturës me numër 30, Kuvendi ka paguar në 5 mars shumën 184500 lekë për foto të realizuara në dhjetor 2012.