Avokati i Popullit,Igli Totozani priti sot kryetaren e Këshillit Kombëtar të Konfederatës Zvicerane, znj. Maya Graf.
Graf shprehu interesin e saj në lidhje me punën e institucionit të Avokatit të Popullit, problematikat e hasura më së shumti nga ky institucion në drejtim të mbrotjes të të Drejtave të Njeriut dhe situatën në Shqipëri. Nga ana e tij, Totozani i uroi mirëseardhjen znj. Graf në Shqipëri dhe shprehu konsideratën e tij për marrëdhëniet dhe bashkëpunimin midis dy vendeve. Avokati i Popullit vlerësoi marrëdhëniet shumë të ngushta me Ambasadën Zvicerane për kontributin dhe mbështetjen e ambasadores zvicerane ndaj institucionit të Avokatit të Popullit dhe më tej i uroi mirëseardhjen ambasadorit të ri të Zvicrës në Shqipëri. Më tej Totozani bëri një pasqyrë të punës së institucionit dhe foli mbi çështjet më delikate të trajtuara nga institucioni i Avokatit të Popullit si dhe shqetësimin e tij lidhur me përhapjen e retorikes nacionaliste në Shqipëri. Igli Totozani u ndal veçanërisht tek natyra e ankesave të dërguara pranë institucionit, tek komunitetet të cilat kanë më shumë nevojë për mbrojtje institucionale në Shqipëri si dhe tek vështirësitë e hasura në kuadër të bashkëpunimit me institucionet e tjera.
Znj. Graf shprehu falenderimin e saj për disponibilitetin e z. Totozani për të qënë kaq i hapur dhe transparent mbi punën e institucionit të Avokatit të Popullit në Shqipëri, duke e vlerësuar këtë si një shenjë pozitive për një vend të vogël si Shqipëria. Më tej ajo shprehu interesin e saj mbi çështjen e Romëve në Shqipëri.
Në fund të takimit, kryetarja e Këshillit Kombëtar të Konfederatës Zvicerane, znj. Maya Graf u shpreh se problematikat që u ngritën gjatë takimit nga Avokati i Popullit, ajo do i diskutojë dhe në takimet e tjera që po zhvillon në Shqipëri.