Janë identifikuar mëngjesin e djeshëm tre viktimat e aksidentit tragjik të ndodhur rreth mesnatës së shtunë në Kukës. Ngjarja e rëndë u shënua rreth orës 23:20, kur një kamion i ngarkuar me tulla doli nga aksi kryesor Kukës-Kolsh, goditi trafikndarësen dhe u përmbys. Mjeti mbante targa të Kosovës, ndërsa në të udhëtonin tre persona.
Policia bëri të ditur se 2 prej viktimave janë pjesëtarë të së njëjtës familje, babë e bir, nga Shënmëria dhe i treti është shoferi i mjetit të rëndë. Ata janë Idajet e Bashkim Shpata, 19 dhe 45 vjeç, nga Fshati Shën Mëri i Kukësit, si dhe Dem Saraçi, 40 vjeç, nga fshati Kryemadh. Autoritetet thanë se shkaku i aksidentit është shpejtësia e lartë, që solli si pasojë humbjen e kontrollit të automjetit.
Kamionçina u përplas me trafikndarësin, duke u shkaktuar vdekjen e menjëhershme të tre viktimave. Pas aksidentit u bllokua për disa orë segmenti nga Tuneli i Kalimashit, deri në Kukës, ndërsa u deshën disa orë për identifikimin e viktimës së tretë.