Truku i azilit në Francë, Moro: Lënë fëmijët në qendra sociale

Franca është e shqetësuar për rritjen e numrit të shqiptarëve që qendrojnë në mënyrë të paligjshme në këtë vend. Ambasadorja franceze në Tiranë, Cristinë Moro, është shprehur se është në rritje numri i minorenëve që lihen qëllimisht në Francë nga familjet e tyre. Ajo kërkoi nga qytetarët shqiptarë që të respektojnë procedurat për të mos rrezikuar lëvizjen e lirë, ndërsa bëri të ditur se shumë shpejt mes dy shteteve do të nënshkruhet marrëveshja e ripranimit.

“Që prej vitit 2012 ka një rritje të rëndësishme të qendrimit illegal të shqiptarëve njëkohësisht ka patur një rritje të rëndësishme të kërkesave për azil. Kemi konstatuar një rritje të qenësishme të minorenëve në shtetin tonë. Ata janë lënë aty nga familjet e tyre të cilat më pas kthehen në Shqipëri. Qendrimi  I këtyre minorënevë në Francë, minorenë të braktisur i quajmë ne, është shumë shqetësues, pasi ata e kanë vendin pranë familjeve të tyre dhe jo në qendra.në bashkpunojmë ngushtë me policinë shqiptare.  Këta shkelës të ligjit duhet ta dinë se cfarë ndodh nëse shkel ligjin”, deklaroi Moro.

Ambasadorja franceze i bëri deklaratat në aeroportin e Rinasit, ku e shoqëruan nga drejtori i përgjithshëm i policisë, Hysni Burgaj, pa nga afër teknologjinë për kontrollin e shtetasve. Nga ana e tij zoti Burgaj tha se po merren masa të vazhdueshme për të zvogëluar numrin e azilkërkuesve.

Shkelja e procedurave të lëvizjes së lirë, është një çështje që është përcjellë në Bruksel nga disa vende europiane, duke propozuar masa shtrënguese. Më herët shqetësimi për rritjen e numrit të azilkërkuesve shqiptarë është shprehur edhe nga qeveria e Belgjikës.