Turizmi, projekt i ri qeveritar për promocionin e tij

Afrimi i sezonit turistik ka risjellë në vëmendje më të përqendruar iniciativat qeveritare për ta mbështetur këtë sektor. Në kuadër të kësaj Këshilli i Ministrave ka hartuar një projektligj të ri ku që në krye të qëllimit saktësohet motivacioni: “Të promovojë Shqipërinë si destinacion turistik tërheqës për vizitorë vendas e të huaj, duke mbështetur zhvillimin e një turizmi të qëndrueshëm, duke siguruar që ofruesit e shërbimeve turistike të përmbushin kërkesat e turistëve, në një mjedis të shëndetshëm dhe të sigurtë, dhe duke respektuar nevojat e komuniteteve pritëse të sotme dhe të brezave të ardhshëm”.

Pse një ligj i ri?       

Në argumentet që shoqërojnë projektin e ri qeveritar për hartimin e këtij ligji, jepen dhe një sërë argumentesh pse e bëjnë këtë iniciativë të domosdoshme. Sipas relatorëve ligji ekzistues, pavarësisht përpjekjeve për të dhënë përkufizimet në fushën e turizmit, kishte mangësi në përmbajtjen e tyre dhe mungonin përkufizime të rëndësishme të fushës së turizmit. Po kështu ligji ekzistues nuk parashikon qartë ndarjen e kompetencave të institucioneve përkatëse në fushën e turizmit dhe, në shumë raste, ka mbivendosje të tyre ose paqartësi në lidhje me to. “Fondi i Zhvillimit të Turizmit. Edhe pse ky fond parashikohet nga ligji, ai nuk u krijua asnjëherë, duke mos mundësuar mbështetjen e shtetit në zhvillimin e industrisë së turizmit”, thuhet në relacion. Po kështu në ligjin aktual nuk parashikohet licencimi i subjekteve që ushtrojnë veprimtari turistike, gjë që ka sjellë një shërbim jocilësor dhe pa standarde, në dëm të konsumatorit dhe njëkohësisht, ka ndikuar dukshëm në rritjen e informalitetit.

Klasifikimi i strukturave akomoduese dhe udhërrëfyesit turistikë

Ligji aktual i turizmit nuk parashikon kategorizimin dhe klasifikimin e strukturave akomoduese. Mungesa e këtij procesi ka sjellë një situatë kaotike në tregun hotelier. Strukturat akomoduese përdorin shenja dalluese (yje) të klasifikimit që nuk përputhen me standardet reale të strukturës apo me nivelin e shërbimit që ofrojnë. Ligji në fuqi nuk parashikon rregullimin e segmentit thelbësor në industrinë e turizmit, atë të udhërrëfyesve turistikë. Rolin e udhërrëfyesve mund ta luaj çdo person që zotëron një gjuhë të huaj, i cili nuk ka njohuritë e domosdoshme lidhur me teknikat e guidimit turistik si dhe nuk zotëron njohuritë e duhura për destinacionin apo produktin që prezanton. “Ka patur raste që udhërrëfyesin në territorin e Shqipërisë e kanë bërë të huaj, shoqërues të grupit të turistëve, të cilët jo vetëm që nuk ka patur njohuritë e domosdoshme mbi vendin, por edhe kanë bërë keqinterpretime dhe deformime të informacionit mbi historinë dhe gjeopolitikën e Shqipërisë, bazuar në interesa antishqiptare”, shpjegohet në relacion.

Turizmi, vetëm saktësim dhe promocion?

Ligji i ri për turizmin parashikon një sërë përcaktimesh të përmendura dhe më lart. Saktëson dhe nivelin e gjobave kur ligji nuk zbatohet, duke ju referuar standardeve ndërkombëtare. Por tej këtyre termave të detajuar, nuk sillen në vëmendje një sërë mangësish të tjera në këtë sektor të rëndësishëm të ekonomisë shqiptare. Grupime të këtij sektori, të formalizuara në shoqata që mbrojnë interesat e turizmit, kanë përsëritur në mënyrë të vazhdueshme se “që të jemi konkurrues në këtë sektor, veç formalizimit të nevojshëm, duhet trajtuar si një sektor preferencial në sistemin e taksimit”. Nëse ne duam të jemi konkurrues në rajon dhe jemi në kërkim të zhvillimit të një sektori kaq të rëndësishëm, duhet të jemi më fleksibël në sistemin e taksimit, duke qenë konkurrentë me këto vende. Tatimi mbi Vlerën e Shtuar në këtë sektor është i ndryshëm në vende të ndryshme dhe vetëm në në rajon e kemi në nivelin 20 për qind. Vendet e tjera i kanë përkatësisht: Greqia 6.5%, Mali i Zi 7%, Kroacia 10%, Bullgaria 7%, Maqedonia 5%, Rumania 9% Serbia 8% dhe Sllovenia 8.5%. Turizmi është paraqitur nga të gjitha qeveritë, si sektor prioritar i ekonomisë dhe eksporteve, duke dhënë një kontribut në masën 14.7% në Prodhimin e Brendshëm Bruto dhe ka të punësuar direkt dhe indirekt mbi 50 mijë vetë. Taksat kanë një ndikim shumë të madh, pasi produkti turistik është në konkurrencë të fortë te vendet e Ballkanit. Po kështu ne vijojmë të kemi çmimet më të larta të biletave të avionit apo trageteve, nuk kemi ende kompanitë ajrore low cost, nuk kemi ende një infrastrukturë lehtësuese dhe mbetemi ende tek kërkesa për turizëm detar, kur në vendin tonë shumë mirë ky sektor mund të jetë tërheqës gjatë gjithë vitit. Tej këtij projekti që do të diskutohet këto ditë në kuvend, nga operatorët e kësaj fushe shtrohet kërkesa që të mund të merren në konsideratë dhe kërkesat për lehtësira fiskale, që në mënyrë të tërthortë do t’i gjeneronin sërish këto të ardhura të munguara nga taksimi i drejtpërdrejtë.

Synimi i projektit

• Krijimi i një turizmi të qëndrueshëm dhe miqësor me mjedisin dhe gjithëvjetor;
• Rritja e numrit të turistëve, netë qëndrimeve dhe të ardhurave prej tyre;
• Rritja e cilësisë së shërbimeve, nëpërmjet vendosjes së kritereve, rregullave e standardeve;

• Reduktimi i informalitetit dhe krijimi i bazës së të dhënave;
• Investime strategjike në turizëm, duke krijuar lehtësira në procedura dhe incentiva;
• Rritja e cilësisë së jetesës së komunitetit, nëpërmjet punësimit në industrinë e turizmit.