Turp z.Basha që fyeni mësuesit e fizkulturës

Sporti në Shqipëri gjithnjë ka vuajtur mentalitetin e gabuar të të bërit sport, jo nga ata që stërviten çdo ditë në një fushë të blertë apo pallat sporti, por nga ata që duan të bëjnë politikat e tij. Kjo krizë për të patur vizionin e duhur ka sjellë edhe gjendjen aktuale. Dhe, për fat të keq, edhe sot pas 24 vitesh demokraci, shikon e dëgjon sërish të njëjtët demagogë të paaftë që flasin e ngatërrojnë politikën me sportin.

I tillë është edhe kryetari i Bashkisë së Tiranës, Lulzim Basha, që çuditërisht, në sy të të gjithë shqiptarëve, përdori fjalët më fyese për sportin dhe kërkoi ta fusë atë në qorrsokakun e politikës, që nuk ka bërë asgjë të hajrit për sportin. Z.Basha, deklarata juaj për 400 mësuesit e rinj të fiskulturës ishte e rëndë për këdo që merret, që ka bërë apo ka dëshirën për të ushtruar sport në të ardhmen. Ju vetë jeni marrë me sport, por, me sa duket, keni harruar që mbi kokë keni patur një trajner, që ka qenë edhe mësues fiskulture. Një njeri që është përpjekur t’ju edukojë me frymën sportive, por që ju me sa duket nuk ia keni vënë veshin, përderisa fyeni mësuesin e fiskulturës, fyeni atë mësues që ju ka stërvitur.

Z.Basha, 400 mësues të rinj fiskulture nuk janë 400 vende të reja pune, por janë 400 mësues që do të edukojnë një brez të ri se si të merren me sport; si t’i largohen rrugës e veseve të këqija dhe t’i drejtojnë të rinjtë drejt aktiviteteve sportive. Janë 400 mësues fiskulture që do të mbajnë hapur palestrat e shkollave pas orës së mësimit, në një kohë që ju e Partia juaj i keni mbyllur ato. Janë 400 edukatorë, njerëz për të cilët Shqipëria sot ka nevojë, për të edukuar me frymën e “fair play” dhe edukatës sportive. Është pikërisht ky modeli europian i sportit që ne duam të adaptojmë, ku këta 400 mësues fiskulture të jenë edukatorë të brezit të ri.

Por ju këtë gjë nuk e kuptoni dhe haptazi fyeni rëndë këta mësues, ata prindër e të rinj që sot merren me një aktivitet sportiv. Ju ende nuk kuptoni rëndësinë që ka sot për rininë të merret me sport, një mënyrë e mirë për të formuar karakterin e tyre dhe për t’i larguar ata nga droga, dhuna, kazinotë etj. Po z.Basha, sot sporti është një problem që duhet të na prekë në zemër të gjithëve, jut ë parit, që duhet të bëni opozitë për zhvillimin e sportit e ju të lini bosh karriget në Parlament e më pas të çoni fëmijët tuaj në fusha sporti sikur s’ka ndodhur gjë.

Ndoshta ju z.Basha mendoni për sportin ashtu siç keni bërë me Bashkinë e Tiranës, ku e keni çuar sportin në nivelet më të ulta, si në futboll ashtu dhe në shumësportësh. Modeli juaj anti-sport u pa kur ndërruat trajnerët në çdo sport sapo erdhët në krye të Bashkisë, duke i parë ata trajnerë si të punësuar e frymën politike e jo si edukatorë sporti. Kjo erdhi falë vizionit tuaj dritshkurtër.

Turp për ju z.Basha që fyeni mësuesit e fiskulturës, turp për vizionin tuaj negativ që keni për sportin, që ashtu si paraardhësit tuaj duan ta ngatërrojnë atë me politikën dhe nuk lënë kampionët e vërtetë të ecin përpara. Ju prisni dhe i nderoni kampionët e sportit, por më pas ndalni mësuesit e fiskulturës t’i nxjerrin ata talente nga bankat e shkollës.