Dy fjalë për reformën e padrejtësisë

Mënyra si është formuluar neni 25 i ligjit që pritet të diskutohet dhe miratohet në Parlament, në rastin më të mirë, tregon për nivel të mjerë juridik të formuluesve si dhe të atyre juristëve shqiptarë që e kanë lexuar dhe e kanë kaluar në heshtje. Në rastin më të keq, një formulim i tillë i atij neni flet për ligësi dhe  prapamendim të formuluesve. Cilido version që të jetë i vërtetë, konkluzioni se shumica e juristëve të shumicës parlamentare shqiptare që janë marrë me këtë punë, nuk meritojnë as detyrën e gjyqtarit të gjykatës së shkallës së parë, mbetet në fuqi.

Përmbajtja e nenit 25 të këtij projekt-ligji bie në kundërshtim me aktet ndërkombëtare të të drejtave të njeriut si dhe me Kushtetutën e RSH. Shkaku qëndron në faktin se shtetas shqiptarë që kanë mbajtur poste të ndryshme politike apo në sistemin gjyqësor diskriminohen dhe nuk trajtohen njëlloj edhe sikur të kenë kryer të njëjtin krim, në të njëjtin vend dhe në të njëjtën kohë. Diskriminimi qendron në vendosjen e afteve të ndryshme të mundësisë së organeve hetimore dhe gjyqësore për t’i ndjekur penalisht për krimet e kryer, bazuar në postin e mbajtur më parë.

Legjislacioni aktual penal i RSH i ka të përcaktuar qartë afatet e ndjekjes penale të veprave penale, qofshin ato krime apo kundërvajtje. Afatet e ndjekjes penale, jo vetëm duhet të jenë të njëjtë për të gjithë shtetasit, pavarësisht pozitës së tyre shoqërore, por këto afate duhet të përcaktohen në raport me rrezikshmërinë e krimeve të kryer. Përndryshe ne bëjmë ligje të posaçme për individë që ndodhen në pozita shoqërore të veçanta. Nëse ky nen do të miratohet ashtu siç është formuluar, atëhere do të kemi një amnisti për individë të ndryshëm shqiptarë dhe reforma do të konsiderohet me të drejtë nga populli shqiptar si Reforma e Padrejtësisë.

Bindja ime mbetet e patundur se korrupsionin dhe padrejtësinë do t’i luftojnë njerëzit e ndershëm dhe jo emrat apo format e organizimit të institucioneve ndëshkuese. Legjislacioni i ri duhet t’i shërbejë verifikimit të veprimtarisë kriminale të kandidatëve për poste gjyqësore si dhe gjyqtarëve që mbajnë poste në organet e sistemit gjyqësor. Ai legjislacion që s’do të bëjë të mundur pastrimin e organeve të drejtësisë nga kriminelët që paguhen me paratë tona për të na shërbyer por që i kanë shërbyer krimit dhe thasëve me para, ai legjislacion nuk duhet miratuar kurrsesi.

Viktor Malaj – Botuar sot në DITA si pjesë e forumit “Turpi i nenit 25”