Kryeministri i Republikës së Kosovës, Hashim Thaçi, ka pritur sot në takim ministrin e Mbrojtjes të Republikës së Turqisë, İsmet Yılmaz. Në takim është biseduar për bashkëpunimin mes Qeverisë së Kosovës dhe Qeverisë së Turqisë, për thellimin e këtij bashkëpunimi, me theks të veçantë në mbështetje të Forcës së Sigurisë të Kosovës.
Kryeministri Thaçi vlerësoi lart marrëdhëniet ndërshtetërore mes Republikës së Kosovës dhe Republikës së Turqisë, duke shtuar se vendi mik, Turqia, ka luajtur një rol të rëndësishëm në të gjitha periudhat, në mbështetje të lirisë, të pavarësisë dhe tani në mbështetje të forcimit dhe konsolidimit të mëtejmë të shtetit demokratik të Kosovës, thuhet në një komunikatë të lëshuar nga Qeveria e Kosovës.
Sipas saj, kryeministri Thaçi ka falënderuar ministrin e Mbrojtjes të Republikës së Turqisë, İsmet Yılmaz për përkrahjen që qeveria e Turqisë i ka dhënë Forcës së Sigurisë të Kosovës, që nga themelimi i saj dhe tani në vazhdimësi.
Nga ana tjetër, Ministri turk Yılmaz ka ripërsëritur qëndrimin zyrtar të qeverisë së Turqisë në mbështetje të integritetit dhe sovranitetit të Republikës së Kosovës dhe ka premtuar se Turqia do ta vazhdojë mbështetjen për Kosovën në rrugën e saj drejt anëtarësimit e Aleancës Veriatlantike të NATO-s. / Kosovapress