UÇK: Do të godasim pa mëshirë strukturat e pushtetit kriminal në Maqedoni

Përmes një deklarate adresuar opinionit shqiptar në trojet etnike dhe në diasporë, që thuhet se është lëshuar nga Shtabi i Përgjithshëm i Ushtrisë Çlirimtare Kombëtare, kërkohet nga Ali Ahmeti dhe anëtarët e partisë së tij të lëshojnë institucionet qeverisëse, duke kërcënuar se do të godasin pa mëshirë këto struktura, që janë vënë në shërbim të një pushteti kriminal.

Në deklaratën e nënshkruar nga zëdhënësi i Ushtrisë Çlirimtare Kombëtare thuhet se, lufta e popullit shqiptar deri në vitin 2001, solli ndryshime në marrëdhëniet e brendshme politike, duke respektuar të drejtat kombëtare brenda trojeve etnike, edhe pse në kufij të ndarë.

“Marrëveshja e Ohrit u konsiderua një sukses, por ajo në vazhdimësi nuk i plotësoi detyrimet e saj, për shkak të lëshimeve politike të qeverisjeve që kanë kaluar në shtetin e Maqedonisë.

“Mbi të gjitha, lejimi i përdhosjes ekstreme dhe dhunimi i dinjitetit kombëtar në të gjitha format prej strukturave policore ushtarake shtetërore të shtetit të Maqedonisë, kalimi në një jetë të padurueshme përballë këtij presioni në rritje, korrupsioni i thellë moral dhe politik në faktorin politik shqiptar, na kanë detyruar ti drejtohemi rrugës së reagimit të fortë, nëpërmjet të gjithë formave, për të mbrojtur të drejtat e popullsisë tonë në shtetin e Maqedonisë. Për luftëtarët dhe ish luftëtarët e Ushtrisë Çlirimtare Kombëtare, në rrugën e idealeve kombëtare dhe Betimit të Luftëtarit të UCK, nuk ka kthim prapa, deri në realizimin e objektivave tona politike e ushtarake”, thuhet në deklaratën e nënshkruar nga zëdhënësi i UÇK-së, Komandant Flamuri.