“D(r)itë” e dashur, për ta ilustruar atë çka z.Vasil Thanasi me të drejtë shtronte në protestën e vet, po ju sjell një shembull të freskët që më ndodhi dje. Njëri nga përfituesit e medemek “Rilindjes”, që, tok me të shoqen, shpien në arkën e familjes së tyre mbi 125.000 lekë (të reja), me ton gati urdhërues më “këshilloi” se duhej të votoja për “Rilindjen” në zgjedhjet e vitit pasardhës. Bëhemi tri vota në familje dhe kemi vendosur të bojkotojmë, ndonëse jemi tepër më të majtë se zotëria dhe partia e tij. “Rilindësit” jo vetëm që na kanë lënë pa punë e pa përkrahje sociale, por edhe, siç shprehet i nderuari Vasil Thanasi, veç nivelit mizerabël kulturor, shpërfaqin ndaj nesh një shpërfillje të neveritshme! Dhe, kësisoj, kam vërejtur mijëra shembuj kësodore. Atëherë, përse duhet t’i rivotojmë, xhanëm? Faleminderit, D(r)ita jonë!