Ushqimet më të pasura me kalcium

Ushqimet e pasura me kalcium janë thelbësore për shëndetin tonë. Më mirë akoma nëse këto ushqime kanë në përbërje kalciumin e kombinuar me magnez apo me hekur. Produktet që janë të pasura me kalcium janë shumë të dobishme për shëndetin e mirë të dhëmbëve dhe kockave. Sasia e nevojshme e kalciumit për një të rritur në ditë është 1.000 – 1.200 mg.

Adoleshentët janë kategoria që kanë më shumë nevojë për ushqime të pasura me kalcium. Gjithashtu, roli i kalciumit në rastet e të sëmurëve me osteoporozë është primar, pasi ndikon pozitivisht nëse kombinohet me vitaminën D. Ja një listë e ushqimeve që janë të pasura me kalcium.

Qumështi dhe nënproduktet e tij

Qumështi dhe të gjitha produktet që bëhen prej tij përmbajnë një sasi të konsiderueshme kalciumi. Në një gotë qumësht lope gjenden rreth 300 mg kalcium. Sasia e kalciumit është e njëjtë në të gjitha variantet e qumështit: i skremuar, pjesërisht i skremuar apo i paprekur. Te kosi, sasia e kalciumit është 150 mg për 100 gram, ndërsa tek djathërat kjo sasi ndryshon në varësi të llojeve.

Vezët

E verdha e vezës përmban shumë kalcium. Por sasia më e madhe e kalciumit ndodhet te lëvozhga e vezës, e cila përbëhet e tëra prej këtij elementi. Në mënyrë që organizmi ynë të përthithë të gjithë kalciumin e lëvozhgës së vezës, kjo e fundit duhet bluar dhe të konsumohet, megjithëse shija nuk është e këndshme.

Peshku dhe frutat e detit

Disa lloje peshqish si sardelet apo salmoni përmbajnë sasi të mëdha kalciumi. Gjithashtu, ky element gjendet në sasi të madhe edhe te frutat e detit si molusqet, midhjet dhe karkalecat.

Frutat e thata

Janë burim i vërtetë i kalciumit. Sasia e pranishme në to mund të jetë e barabartë me atë që gjendet te qumështi. Për këtë arsye, frutat e thata si bajamet, arrat, lajthitë dhe fistiqet rekomandohen nga mjekët për të sëmurët me osteoporozë.

Perimet

Mes perimeve me përmbajtje të lartë kalciumi, veçohet soja. Për më tepër, ajo përmban edhe daidzeinën, një element që parandalon dekalcifikimin e kockave. Sasia e kalciumit në farat e sojës është 102 mg për 100 gram.

Sallatërat

Spinaqi, brokoli, lakra, rrepa janë perime që kanë përbërje të lartë të kalciumit vegjetarian. Në rastin e spinaqit, sasia e kalciumit varet nga mënyra se si është gatuar. / Përgatiti: Gazmira Sokoli