Ushtarakët, ISSH zbardh 155 pensionet e reja (LISTA)

Organet e Sigurimeve Shoqërore detajojnë listën e re të pensioneve të llogaritura në radhët e ish-ushtarakëve. Krahas përfitimeve të parakohshme ekspertët e sigurimeve shoqërore kanë detajuar edhe rillogaritjet e masës së pensioneve të pleqërisë dhe atyre familjare me të cilat do të trajtohen ish-ushtarakët. Gjatë javës që lamë pas ka përfunduar procesi i llogaritjes për caktimin e masës së pensionit që u takon në bazë të ligjit rreth 155 përfituesve të rinj të kësaj shtrese. Bashkëngjitur shkrimit do të gjeni të plotë listën e pensioneve të lidhura për përfituesit sipas rretheve përkatëse.

Sipas ekspertëve të sigurimeve shoqërore, caktimi i pensioneve për këtë kategori është bërë menjëherë sapo organet përgjegjëse kanë depozituar të dhënat e kërkuara mbi vjetërsinë e punës si dhe pagën referuese që do të përdoret gjatë përllogaritjeve për të gjitha shtresat që përfshin kjo skemë. Në rastet kur përfituesit janë të pakënaqur me masën e pensionit që u është caktuar pas rillogaritjes, kanë të drejtë që të kërkojnë një verifikim të dytë sipas pretendimeve të ngritura.

Për këtë fillimisht duhet përgatitur ankesa me shkrim e cila duhet dërguar pranë Institutit të Sigurimeve Shoqërore. Do të jenë ekspertët e këtij instituti që do të verifikojnë edhe një herë masën e pensionit të caktuara. Nëse edhe pas llogaritjes së dytë masa e pensionit mbetet e njëjtë aplikuesit nuk i mbetet gjë tjetër veçse t’i drejtohet organeve gjyqësore për të zgjidhur me tej shqetësimin e tyre.