Vajza e Kryeministrit, 200 milionë të ardhura në vit

Deputeti socialist Taulant Balla ka vijuar të sjellë fakte lidhur me pasuritë e familjes së kryeministrit Sali Berisha. Duke folur tashmë për vajzën e kreut të qeverisë, deputeti deklaroi se Argita Berisha-Malltezi, si mësuesja më e paguar në Evropë, me 12 milionë lekë në muaj, në fakt ka edhe pasuri të tjera.

Sipas tij, një shumë tjetër mjaft e madhe sigurohet edhe nga qiratë dhe pronat e paluajtshme që ajo disponon në të gjithë Tiranën e madje edhe më tej. Në deklarimin e Argita Malltezit rezulton se ajo përfiton 42 milionë lekë në vit nga qeratë marramendëse.

“Janë tre apartamente super luksoze në Tiranë, në rrugën “Mustafa Matohit”, aty ku jeton edhe babagjyshi Kryeministër; në rrugën “Lidhja e Prizrenit”; dhe tek “European Trade Center” (ETC), të cilat janë prona të zonjës Berisha dhe që ajo thotë se i ka dhënë me qira”, u shpreh Balla. Qiratë e deklaruara nga vajza e Kryeministrit janë: 900 euro në muaj, 1170 euro në muaj dhe 1450 euro në muaj. Vetëm për apartamentin në rrugën “Mustafa Matohiti”, rezulton se Argita Malltezi ka shpenzuar plot 378 milionë lekë për ta blerë. Bëhet fjalë për një “shtim në sipërfaqen e apartamentit” siç deklarohet nga vetë ajo, prej 121 metrash katrorë, vijuar nga blerja e një tjetër apartamenti tjetër në po atë kat, me një sipërfaqe prej 195 metrash katrorë, në total 316 metra katrorë apartament. Rezulton se në pronat e paluajtshme përfshihet edhe një vilë qindra metra katrorë në Gjirin e Lalëzit.

“Pas gjithë këtyre 200 milionë lekëve të ardhura, në deklaratën e vitit të shkuar shtohen edhe nja 8 mijë euro, para xhepi, “pagesa të prapambetura nga aktiviteti tregtar”, që sipas vetë kësaj zonje e kishte ndërprerë dy vite më parë, për t’iu përkushtuar mësimdhënies. Thënë më qartë vajza e kryeministrit të vendit fiton plot 17.5 milionë Lekë në muaj, pra më shumë se 210 milionë lekë në vit, një pagë kjo e krahasueshme me pagat e Presidentëve, zëvendëspresidentëve apo Kryeministrave të vendeve të zhvilluara”, vijoi deputeti socialist.

Ndërsa në Shqipëri nëse je një mësues i zakonshëm të duhet të shtrëngohesh e të racionohesh për të arritur fundin e muajit, “nëse je vajza e Kryeministrit edhe mësuese bëhesh milionere”.

“Duhet të sqaroj se këto 210 milionë lekë janë vetëm ato që janë deklaruar si fitime në një vit të vetëm. Në ditët në vijim ne do të vazhdojmë zbardhjen e këtyre padrejtësive që po pasuron një familje biologjike e politike në kurriz të të gjitha familjeve të këtij vendi”, deklaroi deputeti Taulant Balla, i cili shpesh pas deklaratave të tilla është kërcënuar nga familja kryeministrore edhe me procese gjyqësore.