Valon Berisha, i mërzitur nga tifozët

Djaloshi shqiptar që luajti me Norvegjinë, Valon Berisha, kishte paralajmëruar se do të bënte detyrën si norvegjez nëse trajneri do ta aktivizonte kundër Shqipërisë. Ai hyri në pjesën e dytë të takimit në Oslo, por misioni që i kishte vënë vetes iu vështirësua në kulm nga orteku i vërshëllimave që e priti sapo këmba e tij preku fushën. Berisha ka mbetur i befasuar, pasi nuk e kishte pritur një reagim të tillë nga tifozeria shqiptare, në numër më të madh se ajo norvegjeze në tribunat e stadiumit “Ullevaal”. “Nuk jam pritur shumë mirë dhe nuk pres që të pritem, pasi u vërshëlleva më së shumti”, tha Berisha, i cili është lindur në Suedi, por prindërit i ka nga Kosova. “Prej momentit që u futa në fushë u mundova të jap maksimumin dhe besoj se do të kishte qenë më e lehtë për mua sikur të kisha pasur më tepër minuta kundër Shqipërisë”. 20-vjeçari, i cili luan në Austri me Red Bull Salzburg, ka thënë se është mërzitur me vërshëllimat që i “dhuruan” tifozët shqiptarë. Ai thotë se nuk e ka pasur aspak lehtë të luajë kundër Shqipërisë. Sipas tij, media në Shqipëri kanë shkruar shumë për të, kështu që tifozët e kanë ditur shumë mirë se kush është ai. “Kam mbetur ca i mërzitur, por nuk i fajësoj tifozët. E kam ditur se do të ketë tifozë shqiptarë në tribuna, por jo gjithmonë ne vërshëllehemi në fushën tonë. Ata krijuan energji dhe atmosferë të mirë në tribuna”, thotë shqiptari i Norvegjisë. Gjithsesi, Berisha mund të ndihet shumë më mirë nëse sheh qëndrimin që iu rezervua pesë shqiptarëve të Zvicrës, për të cilët do të jetë shumë më e nxehtë ardhja në Tiranë, në tetor.