Vargje për 21 Janarin

O bij të shqipes krahë shkruar,

Antifashistë dhe partizanë,

Si grushti mblidhuni bashkuar,

Aty ku shokët na i vranë!

Edhe gjëmoni si tërmeti,

Me duf në shpirt e hakërrim,

Nga ju të dridhet sot pushteti,

Mallkim i madh i vendit tim!

Kushtrim për ne kjo ditë janari,

Të shenjtë për ne janë sot Dëshmorët,

Fort e më fort të ndizet zjarri,

Vrimë të mos gjejnë uzurpatorët!

Ne gjak s’kërkuam asnjëherë,

Se ne nuk jemi si barbarët,

Një qeveri plot kriminelë,

Ja tek ky shesh e panë shqiptarët!

Po ata s’ikën nga pushteti,

S’duan të ikin përsëri,

Po tek njeriu vall’çfarë mbeti,

Mbasi ka vrarë një njeri?

Duhet të ndihet “qeveria”,

Si mbi vullkan! Si mbi tërmet!

S’mund ta durojë Shqipëria,

Atë që vjedh – atë që vret!

Unë nuk kam frikë që t’i pështyj,

M’u në surrat se s’kanë fytyrë,

Një kriminele- qeveri,

Nuk ikën kurrë me dëshirë!

Unë do t’u hiqja dhe kapelen,

Trima të ishin sadopak,

Porse këta siç ishin, ngelën,

Të zinj-të liq dhe burracakë!

Eh, këta janë ca cuba malesh,

Cuba që prapa gardhit vrasin,

Etur për gjak si egërsira,

Si egërsira ulërasin!

Kam plot dy vjet i zemëruar,

Nga kjo e keqe që s’më del,

Nuk është asgjë kjo që kam shkuar,

Nga ç’e ka hak një kriminel!