Vargje për këngë

Emri im tek ty u shkrua!..

 

Ka ca ditë që je larguar,

malli më ka përvëluar,

në çdo yll të kam kërkuar,

po ku je-o i bekuar?!

 

Përse më ke-përse të kam,

përse një Zot ti je për mua,

që të të prek -që të të ndjej,

dhe të të puth sa herë të dua!

 

Kudo të kërkojnë sytë,

se pa ty s’duroj një ditë,

as një ditë e as një orë,

pa ty tretem si dëborë!

 

Mos u largo-mos u vono,

se emri yt tek unë u shkrua,

eja më merr-dhe më rrëmbe,

se një jetim ti je pa mua!

 

O nuse llokumi!

 

Mos rrini si mysafirë,

ngrehuni se plasëm,

mos më rrini si të ngrirë,

sikur s’kemi dasëm!

 

Ti përpara-ne pas teje,

o nuse llokumi,

ndriço si flakë rrufeje,

të na dali gjumi!

 

Sa lezet ka dhëndër dreri,

dhe nuse sorkadhja,

deri sa drita të bjeri,

nuk shkulen nga vallja!

 

Këngë -valle dhe raki,

ky është ilaçi,

trashëgime çift’ i ri,

dhe dasëm e paçi!

 

Mos më plagos!.

Unë të thoshja:”Mos e mos!.”,

o djalo mos më plagos,

po ti nuk e bëre mirë,

më plagose-o qafir!

 

O pëllumb-more pëllumb,

nuk më plagose me plumb,

ato vështrimet e tua,

më hodhën në tokë mua!

 

Unë të thoshja me ngadalë,

po ti s’pyete për fjalë,

dole si lumi me valë,

dhe më mbyte-more djalë!

 

O djalo buzë llokumi,

nuk dua të dal nga lumi,

nga lumi i syrit tënd,

se jam mirë e zura vënd!

A.Duka