VARGJE TË ZGJEDHURA NË VITE

1. Noja keq na talli

Me Barkën Biblike,
Noja keq na talli,
se nga ajo Barkë,
shpëtoi edhe Djalli.

Që ditën që Noja,
Barkën plot e mbushi,
rrinë pranë e pranë,
baruti dhe prushi.

Botës së rilindur,
nuk ju gjet melhemi,
rrinë pranë e pranë,
mjalti edhe helmi.

1998

2. Dëshpërim

O jetë e trishtuar,
si muzikë funebër,
kudo që hedh sytë,
shoh njerëz të egër…

1998

3. Sa gjeneralë

Sa gjeneralë me fanfara nisen,
gjoksepërshkëndritur nga kordonet,
Zot-sa kemi parë se si gremisen,
yjefikur-thellë katakombesh.

1997

4. Vajzat dhe pemët

Kur zhvishen pemët,
ngjajnë të ngrira, të shkreta…
Kur zhvishen vajzat, ndrijnë,
vetëtijnë, si kometa…

1998

5. Misteret e natës blu

Ç’m’i zbulove-dashurore,
misteret e natës blu,
kupë e ndritur qiellore,
u përmbys në sytë e tu.

Natë e kaltër u bë rozë,
dridhet briri nëpër pyje,
sytë e vashës-misteriozë,
buzët m’i mbushën me yje.

E bekuar qofsh-moj natë,
yjet kurrë mos i largo,
ç’e vlen dita-kur djeg vapa,
kur jeton një natë si kjo…

1980

6. Amazona

Shoh një amazonë,
ëndrrave përnatë,
mos-Arben-më thonë,
mos-se bën mëkat!

Dy buzët e saja,
t’i puthja njëherë,
të shkoja pastaj,
drejt e në skëterrë.

Të digjesha valë,
kazanësh me squfur,
kujt i duhet vallë,
parajsa pa puthur?!

1998

7. Bukuroshja që s’ka mend

Për vashë lastaren,
s’më zë kurrë qederi,
që ka naze zane,
po nga mëndja trokë.
Unazë floriri,
në feçkën e derrit,
janë bukuroshet,
që s’kanë gjë në kokë…

1998

8. Gjëmon pylli

Gjëmon pylli anë e mbanë,
kur jep shpirtin elefanti,
po dhe miza-kur e shkelin,
ka dhimbjet e një gjiganti.

1998

9. Pikëllimi

Me fjalë e me sy,
mos e vrit të varfrin,
pikëllimi i tij,
helmon edhe gjarprin.

1997