Vargjet e Arben Dukës!

Skuadra e Rilindjes do ketë dy trajnerë

Tani mos e çani kokën,
S’kemi më ku marrim hua,
Se skuadra e Rilindjes,
Krejtësisht u plotësua!

Tani mos e çani kokën,
Askujt më s’i vihet brryli,
Kishim Naim e Sami,
Na mungonte veç Avdyli!

Samiu është Edi Rama,
Sosi “Vajin e Bylbylit”,
Tash’ i erdhi Ilir Meta,
Të zërë vendin e Abdylit!

Abdyli qe kryetrimi,
Në Rilindje mbi të tjerë,
Askush tjetër veç Ilirit,
Atë vend nuk mund ta zerë!

Po ai nuk mund të jetë,
Si lojtarët rreth’ të tjerë,
Ndaj Rilindja do të ketë,
Me patjetër dy trajnerë!

Fat’ i madh vërtet na gjeti,
Qe 1 Prilli që na ndiu,
Se vjen Meta nga pushteti,
Di defektet tek Saliu!

E trajner’i ri do sjellë,
Plot lojtarë që bëjnë gol,
Ndaj dhe mjaft lojtarë të Ramës,
Tash do dalin pak në stol!

I dha besën burri burrit,
Eh të sigurt’ tani jemi,
Se dhe shqipen e flamurit,
Me dy koka ne e kemi!

Tani po, jemi të parët,
Ecim para si gaforja,
Nuk kanë rëndësi lojtarët,
Rëndësi ka veç fitorja!

Tani kos na u bën’ detet,
Si në vitet e fillimit,
Rëndësi nuk kanë mjetet,
Po veç mbrritja e qëllimit!

Nuk do ndodh’ si aty pari,
Asnjë nuk do bëjë më ngjalën,
Se janë burra për së mbari,
Kan’ treguar që mbajn’ fjalën!

Ato fjalë që qarkullojnë,
Do të mbeten thashetheme,
Mbasi ndeshjen ta fitojnë,
Të dy do hapin probleme!

Tash në fund si në fillim,
Unë jam thjesht poet i “Ditës”,
Ky nuk është morali im,
Është moral i politikës!

Atë ne e kemi dritë,
Jo të zezë si qymyri,
Shyqyr që erdhi kjo ditë,
Që u rikthye Iliri!

Tash na erdhën mjaft lojtarë,
Ndaj Rilindja do t’ia dali,
Rama kot Metën ka sharë,
Se Meta është si Kristali!