Vasili: Vlahutin dhe Euralius varrosën reformën në drejtësi

Kreu i grupit parlamentar të LSI-së, Petrit Vasili ka akuzuar Romana Vlahutin dhe Euraliusin si çirakë të kryeministrit Rama, të cilët kanë zgjedhur të “punojnë” për shfarosjen e drejtësisë në vend.

Përmes rrjetit social “Facebook”, Vasili shkruan se ishin pikërisht Vlahutini dhe Euraliusi që përgatitën raportin në fund të vitit të kaluar për zgjedhjen e kryeprokurores Arta Marku.

Deputeti i LSI-së shton më tej se ata zgjodhën të lënë Shqipërinë pa institucione të drejtësisë, duke kontribuar kështu në zhvillimin e korrupsionit dhe kriminalizimin e qeverisë.

Postimi i Vasilit

Vlahutin dhe Euralius çirakë të Kryeministrit për të kapur drejtësinë.

Euralius dhe BE në Tiranë ishin ata që përgatitën në dhjetor 2017 raportin, pra alibinë për të zgjedhur kryeprokuroren e përkohshme edhe me vetëm 36 vota nga 84 që kushtetuta kërkonte për t’ia bërë sa më të kollajshme kapjen e drejtësisë nga kryeministri si çirakë të të cilit janë.

Motivi ishte gjoja për të kaluar ngërçin dhe kjo do të zgjaste vetëm shumë pak muaj.

Aq sa kryetari i grupit parlamentar të PS Balla deklaronte:

“Sipas ligjit u bë procedura, në kushtet që KLP nuk ishte krijuar. Në vlerësimin tim përzgjedhja e anëtarit të 11-të të KLP-së përfundon në shkurt. Në mars ngrihet KLP-ja. Kryeprokurori i ri me mandat 7-vjeçar në vlerësimin tim zgjidhet në fund të muajit mars-fillim të muajit prill të vitit të ardhshëm.”

Pra gjoja në prill mbyllej mandati i Arta Markut dhe më tej do zgjidhej prokurori i përgjithshëm edhe SPAK edhe BKH.

Por Euralius dhe Vlahutin e dinin dhe e dinë shumë mirë të kundërtën, të cilën e fshehin me qëllim edhe sot e kësaj dite edhe në një raport të tyre në mars të 2018 ku e vërteta thuhet shumë qartë:

“Ky proces mund të marrë muaj të tjerë dhe do të çojë në rezultatin që krijimi i Këshillave [KLGJ ose KLP] të bëhet vetëm në fund të vitit 2018 ose më vonë.”

Shpjegimi është i thjeshtë: Euralius dhe Vlahutin zgjodhën të jenë çirakë të kryeministrit kundër reformës në drejtësi, zgjodhën të bekojnë dekapitimin e sistemit të drejtësisë, zgjodhën të lënë Shqipërinë pa institucione të drejtësisë për të betonuar pandëshkueshmërinë e korrupsionit dhe kriminalizimit të qeverisë, zgjodhën të varrosin reformën në drejtësi, e cila sot është tërësisht jashtë kushtetutës dhe ligjit dhe është kthyer në një dokument të pështirë e plot me arna antiligjore të cilin asnjë shqiptar nuk e beson më.

Gjithçka është bërë me vetëdije të plotë nga BE në Tiranë. Vlahutin ia ka fshehur shqiptarëve dhe Brukselit të vërtetën duke deklaruar si impresionante implementimin e reformës në drejtësi, kur në fakt e dinte shume mirë që reforma në drejtësi ka vdekur.

s.a/dita