Kryesocialisti Rama ka shprehur dhimbjen për ndarjen nga jeta të ish-të përndjekurit politik Shpëtim Karamuça. Përmes një postimi në profilin e tij në Tuiter, Rama shprehet se është shumë i dhimbshëm lajmi për humbjen e Shpëtim Karamuçës, i cili pas 26 viteve burg në qelitë e sistemit komunist, jetonte në varfëri të skajshme e përballej me kancerin. “Vërtet i dhimbshëm lajmi i vdekjes së të burgosurit politik Shpëtim Karamuça, 26 vjet burg e së fundi një greve urie me kancerin në trup! RIP”, shkruan Rama.
Shpëtim Karamuça, 74 vjeç, ka ndërruar jetë sot në banesën e tij pas një beteje të gjatë me kancerin. Lajmi u konfirmua nga Instituti i të Përndjekurve Politikë. Një prej miqve të ngushtë të Karamuçës, Gjergj Ndreca, tha për mediat se dhimbjen për vdekjen e Karamuçës e shton indiferenca e shtetit me të cilën kjo kategori përballet përditë.