Veliaj: 70% e ujit të pijshëm vidhet, do të ndalim abuzimet

Në javën kombëtare të ujit, kryetari i Bashkisë së Tiranës, Erion Veliaj, ftoi të gjithë qytetarët të paguajnë faturat e ujit të pijshëm dhe të denoncojnë çdo abuzim për të ndaluar vjedhjet. Kryebashkiaku deklaroi se 70% e ujit vidhet.

“Të gjithë kemi jetuar në Tiranë këto 4 vitet e fundit dhe se si janë hapur lavazhet që punojnë me ujë të pijshëm. Sot nuk besoj se ka ndërmarrje që është menaxhuar më keq se sa UKT. 2/3 e ujit që prodhohet humbet. Dua të ftoj të gjithë qytetarët që të na ndihmojnë me denoncime ku abuzohet me ujin”, deklaroi Veliaj.

Ai shprehu shqetësimin për keqmenaxhimin e kësaj ndërmarrjeve që me ardhjen e tij në krye të bashkisë kishte 1.5 miliardë lekë minus në arkë dhe sot 1.5 miliard lekë më shumë në arkë vetëm në një muaj. Për të shmangur abuzimet Bashkia e Tiranës ka marrë disa masa për menaxhimin e ri të Ujësjellës Kanalizimeve Tiranë.

“Kemi organizuar disa grupe task forcë për të shmangur abuzimet. Kemi bllokuar 15 autobote uji. Kemi arrestuar 10 punonjës të UKT. Tolerancë zero ndaj çdo punonjësi që vjedh. Kemi bllokuar 60 lavazhe që përdornin ujin e pijshëm”, tha Veliaj.

Më tej, kryebashkiaku bëri të ditur se Ujësjellës Kanalizime Tiranë ka sot 65 milionë dollarë borxhe dhe detyrime. “Nga tani e tutje ne nuk kontraktojmë asnjë kompani, por këtë punë ta bëjnë ndërmarrjet e Bashkisë së Tiranës. Ndërmarrjet tona do të bëjnë punë për Ujësjellësin për të shmangur abuzimet”, theksoi Veliaj, ndërsa njoftoi se kjo ndërmarrje është në proces binjakëzimi me UKT në Puglia.

Nga ana tjetër Veliaj shprehu angazhimin për të nxjerrë kompaninë me fitime. “Do të sigurohem që në datën 31 dhjetor të dalë qoftë me 1 lekë fitim dhe kur të dalë me fitim do të shpërndahet si divident të gjithë atyre që paguajnë. Do të sigurohemi që hapim një kapitull të ri se si bëhen punët publike”, njoftoi Veliaj.