Veliaj: Do ndryshoj planin rregullues të Bashës, Blushin e mirëpres në fushatë

Kandidati i mazhorancës për Bashkinë Tiranë, Erion Veliaj shprehet se brenda radhëve të Partisë Socialiste nuk ka asnjë lloj hezitimi për ta pranuar atë si kandidaturë për të drejtuar bashkinë më të madhe në vend.

Madje sipas tij, të gjitha strukturat partiake janë angazhuar në një kohë rekord dhe kanë filluar fushatën për fitoren e zgjedhjeve. “Në një kohë rekord kemi ngritur strukturat tona, ku në çdo njësi po zhvillohet fushatë paralelisht.

“Ne kemi krijuar një koalicion shumë të madh me 40 parti, por koalicioni i vërtetë është ai me qytetarët”, – tha Veliaj duke folur në emisionin “5 pyetje nga Babaramo”.

Gjatë kësaj interviste Veliaj ka folur edhe për raportet që ka me deputetët e PS-së, duke veçuar ata që e kanë mbështetur atë në të gjitha takimet që ka patur në Tiranë, ndërsa Majkon dhe Ramën nuk nguron t’i konsiderojë edhe si mentorët e tij politikë.

“Majko e Rama janë shokët e mi e janë mentorët e mi, ndaj një batutë e thënë mes miqsh s’mund të përdoret në këtë formë. Kam mbështetjen e të gjithëve që po e tregojnë dita-ditës, kam bërë fushatë me Qefalinë, me Tahirin e me çdo deputet tjetër të Tiranës që i njeh mirë problematikat e qytetit dhe të banorëve”, – shtoi Veliaj.

Më tej, pyetjes nëse do të mirëpriste në fushatë deputetin Ben Blushi, Veliaj iu përgjigj se do ishte i mirëpritur kushdo që do kontribuonte në kthimin e Tiranës në rrugën e duhur.

“Blushin dhe këdo që do të japë kontributin e tij në qeverisjen e Tiranës unë e mirëpres”, – tha Veliaj.

Ndërkohë që i pyetur për kritikat që ka patur Blushi ndaj qeverisjes së majtë, Veliaj do të shprehej se “nuk i kam dëgjuar, por di t’ju them se askush nuk mund të thotë sot se ne jemi në destinacionin final. Reforma e pensioneve ka sjellë një sërë përmirësimesh, po ashtu edhe në arsim jemi në drejtimin e duhur. Shih legalizimet. Janë 10-fish më shumë në një vit sesa në 8 vite”.