Veliaj në Greqi: Emigrantët do rilindin Shqipërinë më 23 qershor

Kandidati për deputet i Partisë Socialistë për qarkun e Gjirokastrës Erion Veliaj ka zhvilluar një seri takimesh me emigrant shqiptarë që jetojnë në shtetin fqinj, Greqi, duke u ndalur dhe në kryeqytetin Athinë. Veliaj gjatë takimeve me shqiptarët e emigruar për një jetë më të mirë se sa në tokën e tyre amë, ka marrë garancitë e një vote masive për skuadrën e Rilindjes më 23 Qershor. “Asnjë organizatë politike në Shqipëri nuk ka sesi të mos fokusohet tek emigrantët, këtë mund ta bëjë vetëm Partia Demokratike e cila ju ka harruar. Ju përbëni një pjesë të rëndësishme të Shqipërisë. Janë rreth 1.6 milionë emigrantë shqiptarë në mbarë botën. Veç kësaj, emigracioni gjatë këtyre viteve ka qenë edhe një nga shtyllat kryesore të ekonomisë tonë, pasi dërgesat e tyre përbëjnë mbi 12% të PPB-së tonë. Duke u nisur prej kësaj është më se normale që emigrantët të përfshihen në vendimmarrjen politike, dhe ju duhet të shprehni përmes votës tuaj mesazhin se ndryshimi në Shqipëri është i mundur”, deklaroi Veliaj gjatë një takimi me emigrantët shqiptarë në ishullin e Rodos.

Më tej Veliaj ka zhvilluar një tjetër takim me emigrantët shqiptarë që jetojnë në Athinë të Greqisë deklaroi se shumica e emigrantëve bëjnë pjesë tek ata shqiptarë që e kanë parë me sytë e tyre sesi funksionon një shtet Europian, dhe kjo është arsyeja se pse Berisha u trembet atyre. “Emigrantët e duan Shqipërinë europiane, e dinë se ç’pamje do të kishte një Shqipëri e tillë, dhe sigurisht që Saliu nuk është pjesë e kësaj tabloje. Dhe prandaj Kryeministri ynë në 8 vite nuk ka zhvilluar asnjë takim me emigrantët. Për këtë arsye ne kemi deklaruar gjithmonë se premtimet e Berishës për votën e emigrantëve janë gënjeshtra, sepse votat e tyre janë vota kundër Berishës. Gjithmonë jam habitur sesa shumë te informuar janë emigrantë rreth asaj që ndodh në Shqipëri. Ata i njohin shumë mire vështirësitë ekonomike që po kalon Shqipëria, e dine shumë mirë se vendi është buzë greminës dhe se katër vjet të tjera me Berishën në qeveri do të kishin pasoja katastrofike. Gatishmëria e tyre për të ardhur në Shqipëri vetëm e vetëm që të largojnë me vote Berishën është për t’u admiruar e njëkohësisht burim frymëzimi për ne” deklaroi më tej kandidati për deputet I Partisë Socialistë për qarkun e Gjirokastrës.

Veliaj i ka bërë një prezantim të detajuar të gjithë të emigrantëve shqiptarë të cilët I janë përgjigjur pozitivisht dhe masivisht thirrjes së skuadrës së Rilindjes që ditën e zgjedhjeve t’i kushtojnë Atdheut të tyre një ditë duke shprehur si qytetarë europiane vullnetin e tyre në një periudhë kaq të rëndësishme për të ardhmen e vendit tonë. “Qeveria e Rilindjes, në vetëm 100 ditët e para do kalojë ligjin që do t’u japë emigrantëve të drejtën e votës. Ne do të krijojmë një fond të veçantë vetëm për emigrantët dhe nevojat e tyre, kështu që ata nuk do të jenë kurrsesi jashtë vëmendjes së qeverisë së re. Një tjetër pikë e programit tonë ka të bëjë me mësimin e gjuhës shqipe. Ne do krijojmë një fond për abetare e libra, si edhe për të garantuar që kudo ku ka shqiptarë të ketë edhe mësim në gjuhën shqipe. Gjithashtu, ne do të negociojmë me vendet fqinjë në mënyrë që emigrantëve që kthehen në atdhe t’u njihen kontributet në skemat e pensioneve. Dhe së fundi, ne do të rilindim shërbimin tone diplomatik duke e çliruar atë nga nepotizmi, në mënyrë që emigrantët tanë në botë të mos vuajnë edhe nga paaftësia e atyre që duhet t’i mbështesin e përkrahin”, përfundoi Veliaj.