Veliaj: Shqipëria, vend lider për gratë në vendimmarrje

Ministri i Mirëqenies Sociale dhe Rinisë, Erion Veliaj, ka mbajtur sot një fjalim në Këshillin e Përhershëm të OSBE-së, në Vjenë. Gjatë fjalës së tij, Veliaj u ndal në strategjinë dhe sfidat e qeverisë shqiptare për të promovuar barazinë gjinore dhe luftuar dhunën në familje.

“Barazia mes grave dhe burrave është aspekt thelbësor i një shoqërie të drejtë dhe demokratike, që mbështetet në zbatimin e ligjit. Miratimin e ligjeve dhe politikave për barazi gjinore, qeveria shqiptare i vlerëson si progres në rrugën e saj drejt integrimit evropian. Jemi të vendosur të punojmë fort me partnerët tanë evropianë për të përmirësuar jetën e grave dhe vajzave në Shqipëri”, tha Veliaj në fjalën e tij.

Ai shtoi se qeveria shqiptare është e vetëdijshme se të drejtat e grave janë pjesë përbërëse e të drejtave të njeriut, duke theksuar faktin se ajo ka miratuar të gjitha instrumentet ligjore.

“Shqipëria është e angazhuar ta luftojë dhunën në familje,” u shpreh ministri Veliaj. Sipas tij, përfshirja e gjashtë ministreve femra në qeveri është një shenjë që e reflekton këtë angazhim, ndonëse ka ende për t’u bërë për përfaqësim të denjë të femrave në jetën politike dhe publike.

Shefi i Misionit të SHBA-ve në OSBE, ambasadori Daniel B. Baer, vlerësoi se Shqipëria ka bërë hapa të rëndësishëm në promovimin e barazisë gjinore dhe pjesëmarrjen e femrave në vendimmarrje. “Rritja e numrit të ministreve femra në qeveri këtë vit, përbën një shembull të rëndësishëm të vendosur nga Shqipëria”, tha ai.

Veliaj paraqiti masat që Shqipëria ka ndërmarrë në mbështetje të viktimave të dhunës në familje duke forcuar legjislacionin, rritur bashkëpunimin e shoqërisë civile, si dhe duke rritur kapacitetet e të gjitha grupeve profesionale që trajtojnë dhunën ndaj grave. Ai paraqiti nismat e fundit të Ministrisë së Mirëqenies Sociale dhe Rinisë për t’ua dhënë grave dhe vajzave të drejtën për të tërhequr ndihmën ekonomike, si dhe heqjen e tarifave për kurset e trajnimit profesional. Këto masa janë vlerësuar nga vendet anëtare të OSBE-së duke u veçuar si një nga vendet që ka bërë progres në këtë drejtim.

“Megjithatë, pavarësisht progresit të arritur, dhuna ndaj grave dhe fëmijëve në Shqipëri mbetet një dukuri shqetësuese,” tha ai. “Për të patur progres të qëndrueshëm në këtë fushë kemi nevojë jo vetëm për angazhimin e vazhdueshëm të qeverisë, por edhe të shoqërisë civile, partnerëve ndërkombëtarë dhe shoqërisë shqiptare në tërësi.”

Veliaj tha se qeveria do të vazhdojë të punojë me OSBE në promovimin e mbrojtjes së të drejtave të grave, duke nënvizuar se viti 2014 shënon dhjetë vjet nga koha e krijimit të Planit të Veprimit të OSBE-së për Promovimin e Barazisë Gjinore.

Këshilli i Përhershëm i OSBE-së është organ i rëndësishëm vendimmarrës i organizatës që përbëhet nga 57 vende anëtare. Ky Këshill mblidhet çdo javë në Vjenë për të diskutuar zhvillimet në vendet ku OSBE-ja është prezente dhe merr vendime mbi çështje të caktuara.