Veliaj paraqet programin për mjedisin dhe sulmon kandidatët e pavarur: Janë të Saliut

Kandidati i majtë për Bashkinë e Tiranës, prezantoi sot programin për shtimin e hapësirave të gjelbërta të kryeqytetit, i cili mbështetet në 5 projekte madhore, ndërkohë që firmosi dhe kontratën me qytetarët që përbëhet nga 4 pika.

Veliaj akuzoi kryetarin aktual të Bashkisë së Tiranës, Lulzim Basha se nuk ka mbajtur asnjë premtim për dyfishimin e hapësirave të gjelbërta, duke shtuar se dhe kandidatët e pavarur janë të Saliut.

Gjithashtu Veliaj tha se lejet që janë dhënë nga bashkia janë të Shkëlzen Berishës.

“Ku është dyfishimi i hapësirave të gjelbërta. Tek 60 lejet e ndërtimit që u dhanë. Tek Diga, tek Kaprico në bllok, jetimorja në Tiranë, i vetmi shesh pushimi që kishte shtëpinë. Nuk e di a e patë emisionin, por unë nuk kam turp, sepse nuk jam as si kandidati rival as si këta të pavarur të gjithë të Saliut meqë ra fjala që thonë e kanë fajin të gjithë. Jo jo këto janë lejet e Saliut, janë lejet e Shkëlzenit. Këto kanë emra, nuk është përgjegjësia e të gjithëve. Ndaj dhe përgjegjësinë do ta bëjmë me emër edhe bllokimin me emër edhe ndryshimin do ta bëjmë me emër”, tha ai.

Veliaj bëri publike projektet e mëdha nëse do të marrë drejtimin e kryeqytetit në zgjedhjet e 21 qershorit

1 -Bulevardi i ri i Tiranës

Do të shtrihet në një zonë ende të pazhvilluar në aspektin urban. Do të jetë zgjatim i bulevardit ekzistues, do të gjallërojë zonën me hapësira shërbimesh e aktivitetesh rekreative dhe do të krijojë një sërë hapësirash të gjelbra, duke funksionuar si një park qendror. Do të përfundojë në lumin e Tiranës, ku do të realizohet projekti i Parkut T.

2- Parku i Integruar i Liqenit dhe Parku Olimpik i Tiranës

Projekti do të mbrojë hapësirën ekzistuese të liqenit dhe do ta zgjerojë atë duke e integruar me Parkun Zoologjik, Kopshtin Botanik dhe Parkun Olimpik. Do të ketë investime infrastrukturore dhe ndriçim të rrugëve. Parku Olimpik do ndërtohet tek kompleksi Dinamo dhe do të jetë kompleksi i parë në vend që do të përmbledhë të gjitha federatat sportive në ambiente mjaft cilësore.

3- Kopshti Zoologjik

Do të kthejë një nga kopshtet më të trishta në botë në një park zoologjik me standarde bashkëkohore. Numri i kafshëve do të rritet dhe kafshët nuk do mbyllen më në kafaze, por do të qëndrojnë në mjedise të hapura të ngjashme me habitatin e tyre natyror.

4- Parku i Besimit

Park që do jetë simbol i harmonisë dhe tolerancës fetare në Shqipëri. Do ndërtohet përgjatë bulevardit Dëshmorët e Kombit, ku do të mbillen pemë e bimë që përmenden në Librat e Shenjtë.

5- Parku i Liqenit të Kasharit dhe Liqenet e Tiranës

Liqeni i Kasharit do të kthehet në një park të madh çlodhës që do të ofrojë shërbime unike për banorët e Tiranës metropolitane dhe banorët e zonave periurbane e rurale. Parku do të ofrojë mjedise për shëtitje në pyll, agro-turizëm, plazh si edhe sporte të ndryshme ku veçohet pista e notit. Nga këtu do të nisë një shteg që do lidhë Liqenet e Tiranës duke krijuar një korridor rekreacional për ecje, ekskursione e çiklizëm.

5 pikat e kontratës për hapësirat e gjelbra:

1. Rehabilitim dhe gjelbërim i 6000 m2 hapësira publike të çliruara nga ndërtimet informale gjatë 2 viteve të fundit në Tiranë;

2. Rigjenerim dhe transformim i ish-zonave industriale të Tiranës në hapësira të gjelbërta dhe në shërbim të komunitetit;

3. Aplikim i projektit “Fasadat e Gjelbërta” me qëllim krijimin e hapësirave të gjelbërta vertikale;

4. Identifikim dhe shndërrim i hapësirave potenciale brenda blloqeve të banimit në hapësira të gjelbërta në partneritet me komunitetin dhe bizneset e zonës;

5. Pastrim nga mbetjet i lumenjve në territorin e Bashkisë së Tiranës përgjatë gjithë rrjedhës së tyre.