MMRS premton “zgjidhje dinjitoze” për pensionet

Ministri i Mirëqenies Sociale dhe Rinisë, Erion Veliaj, ka mbledhur sot grupin e punës për reformën e pensioneve. Veliaj tha se reforma e sigurimeve shoqërore do të shndërrohet në një zgjidhje afatgjatë të problemit të pensioneve.

“Raporti mes kontribuuesve dhe përfituesve është ngushtuar shumë. Në vitin 2013 ishin 640 mijë kontribuues dhe 561 mijë përfitues, pra në një raport 1.1 kontribuues për 1 përfitues ndërkohë që kjo skemë të funksionojë ky raport duhet të jetë 4-6 kontribuues për 1 përfitues. Ky raport është kaq alarmant edhe për faj të informalitetit. Çdo biznes i vogël siguron mesatarisht vetëm 1.45 punonjës. Nga ana tjetër, vetëm 65% e forcave të punës marrin pjesë në sistemin e sigurimeve shoqërore. Por, s’duhet harruar as problemi tjetër se edhe ata që janë pjesë e skemës derdhin kontribute vetëm për pagën minimale. Kjo edhe për faj të vetë skemës: lidhja e dobësuar mes kontributeve dhe benefiteve, ku ata me paga të larta derdhin 5fishin e kontributeve dhe mund të marrin vetëm 2fishin e pensionit të atyre me paga të ulëta ka bërë që ata të derdhin kontribute vetëm për pagën minimale. Një problem shumë i mprehtë është edhe diferencimi mes skemës rurale dhe asaj urbane, ku skemë rurale është subvencionuar për shumë vjet nga shteti çka ka rritur deficitin dhe ka ulur kontributet, duke e kthyer këtë skemë në një lloj asistence sociale brenda sistemit të sigurimeve shoqërore. Nëse skema e pensioneve do lejohet që të vazhdojë kështu, pa u reformuar, deficiti do vazhdojë të thellohet, përfitimet do të jenë mjaft të ulëta”.

Veliaj theksoi se lidhur me reformimin e sistemit është ngritur një grupi këshillimi i përbërë nga ekspertët më të mirë të vendit. Pjesë e këtij bordi janë ftuar edhe deputetë me ekspertizë në fushën e pensioneve nga i gjithë spektri politik.

Veliaj tha se heqja e tavanit për sigurimet është një gjë pozitive, pasi kjo i jep mundësinë kujtdo që të kontribuojë më shumë nëse do të përfitojë një pension më të lartë.

“Duhet të kemi skema alternative të sigurimit shoqëror, njerëzit duhet të jenë përfitues të skemave, ashtu siç ndodh edhe në botë e të mos ketë monopol të skemës së sigurimeve”, tha ai.

Ministri theksoi se reforma do të jetë zgjidhje afatgjatë dhe dinjitoze për gjeneratën që vjen.

“Së pari dëshiroj të garantoj çdo pensionist se asnjë e drejtë e fituar deri më tani nuk do të preket. Pra, kjo reformë nuk u drejtohet pensionistëve të sotëm, por të punësuarve të sotëm.

Së dyti, reforma nuk cenon të drejtat e fituara nga qytetarët që janë afër moshës së daljes në pension.

Së treti gjatë gjithë këtij viti, Ministria në bashkëpunim me ISSH do të ndërmarrë një veprim të gjerë për pastrimin e skemës së pensioneve nga çdo abuzivitet”.