Veliaj: Rikonceptojmë transportin publik dhe zgjidhje për trafikun e rënduar

Kandidati i majtë për Tiranën, Erion Veliaj ka prezantuar paraditen e së martës programin e tij për transportin publik, parkimet dhe sigurinë në rrugë, duke vënë theksin te fakti se në të treja këto kategori, në 4 vitet e fundit Bashkia e Tiranës ka degraduar dhe e ka futur qytetin në një kaos.

“Çdo ditë në Tiranë qarkullojnë 140 mijë makina. Mesatarisht secila prej këtyre makinave bën 4 deri në 5 rrugë në ditë, pra në 1 ditë normale në Tiranë ndodhin 800 mijë udhëtime. 140 mijë makina dhe 800 mijë lëvizje me makinë në ditë shkaktojnë një problem të jashtëzakonshëm me trafikun dhe qarkullimin në qytetin tonë. Në 4 vitet e fundit transporti publik ka degraduar plotësisht. Në 4 vitet e fundit nuk ka pasur asnjë përmirësim qoftë edhe minimal”, deklaroi Veliaj.

Ai tha se në 4 vitet e fundit nuk është krijuar asnjë vend parkimi i ri në Tiranë.

“Pavarsisht se çfarë u premtua, sot nuk ka asnjë vend parkimi shtesë, përkundrazi gjërat kanë degraduar për më keq. Në 4 vitet e fundit kemi parë se numri i incidenteve që kanë lidhje me parkimin është rritur. E keni parë se si Tirana është sot nën kontrollin e plotë të kovave, të kanistrave, të vazove, të gomave, të tavolinave që markojnë vëndet e parkimit. Një ushtri me njerëz të papërgjegjshëm kanë sot nën kontroll të gjitha vëndet e parkimit të Tiranës”, shtoi Veliaj.

Një tjetër problem i konstatuar nga Veliaj është edhe ai i mungesës së ndriçimit në 300 rrugë të Tiranës, ku sipas tij, nuk punojnë as semaforët. Ndërkohë, kritika Veliaj i ka rezervuar edhe Policisë Bashkiake.

“Aktulisht ka një mungesë totale të ndriçimit publik në mbi 300 rrugë të Tiranës. Kemi një polici bashkiake që e ka braktisur totalisht detyrën për të qenë garante e sigurisë dhe e mbarëvajtjes së punëve në qytet. Madje ajo që është më e rëndë është që në pjesën më të madhe kemi një polici bashkiake që i bën karshillik policisë së shtetit. Në cilin vend normal ndodh kjo?”, theksoi ai.

Duke sjellë zgjidhje për të gjitha këto kategori, Veliaj tha se do të rikonceptojmë linjat e autobusëve në Tiranë, nga dhjetë linja ekzistuese që kemi, që i shërbejnë vetëm zonës urbane, do ta çojmë në 19-20 linja të reja.

“Është e paimagjinueshme që dikush që udhëton nga Vaqarri për në Dajt duhet të ndërrojë 4 herë autobus, të paguaj 4 bileta të ndryshme, të ketë 4 standarde të ndryshme shërbimi. Në Tiranën e 24 njësive dhe 1 milionë banorëve ne do të kemi një shërbim transporti unik në të gjithë Tiranën, ku bileta do të ketë vlerë në secilën prej linjave të autobusëve”, tha Veliaj.

Ai shtoi se do të rikthejë korsitë e dedikuara për transportin publik që u shkatërruan në 4 vitet e fundit, “si një mënyrë dhe mesazh për qytetarët, ku të thuhet se nëse do të shkosh shpejt diku, shko me autobus ose me biçikletë”.

Për çështjen e parkimit, sipas Veliajt do të ketë një aksion emergjent në 100 ditët e para për të larguar uzurpuesit e vendeve të parkimit.

“Makthi i njerëzve që duhet të negociojnë parkimin me një kovë, me një arkë birre, me një bllok betoni, me një gomë, do të mbarojë”, tha ai.

Më tej, ai ka akuzuar opozitën dhe kandidatin e saj se, po riciklon premtimet e pambajtura të bëra 4 vjet më parë.

Programi për trafikun, transportin publik, parkimet dhe sigurinë në rrugë

1. Përfundojmë Unazën e Madhe brenda mandatit;

2. Masterplan për levizjen e biçikletave dhe këmbësorëve;

3. Zhvillimi i mëtejshëm i qendrës së menaxhimit të trafikut;

4. Rikoceptim i rrjetit të transportit publik;

5. Rikthejmë korsitë e dedikuara për transportin publik;

6. Ndërtojmë tre stacione kryesore terminale;

7. I japim fund uzurpimit të vendeve të parkimit në Tiranë;

8. Ndërtojmë parkingje nëntokësore në partneritete publike-private;

9. Skemë e re pagese për vendparkimet publike;

10. Kompletojmë dhe mirëmbajmë sinjalistikën rrugore;

11. Pajisim me ndriçim e të gjitha rrugëve të Tiranës;

12. Ndërtojmë një strehe për kafshët e rrugëve.